Ўзбекистон аламзада Португалияга қарши

Ўзбекистон миллий терма жамоаси Жаҳон чемпионатидаги иккинчи ўйинини ФИФА рейтингида 5-ўринни эгаллаб турган, турнир олдидан ғолибликка асосий даъвогарлардан бири сифатида эътироф этилган Португалияга қарши ўтказади.

Мағлубиятга учраса-да, ижобий таассурот қолдирган «оқ бўрилар»

Ўзбекистон миллий жамоаси мундиалдаги дебютида Колумбияга ютқазган бўлса-да, майдонда ва унинг ташқарисида катта симпатия (хайрихоҳлик) уйғотди. «Оқ бўрилар» 7-бор Жаҳон чемпионатида қатнашаётган Лотин Америкаси вакилларига қарши баҳсда тарихий голни уришдан ташқари, рақибга ҳақиқий жанг таклиф қила олди ва қўшиб берилган дақиқаларгача ҳисобни тенглаштириш учун ҳаракат қилди. Индивидуал хатолар бўлмаганида, сенсация қайд этилиши ҳам мумкин эди.

Ўйиндан кейин Ўзбекистон ижтимоий тармоқларда янада машҳурликка эришди. Бунга Абдуқодир Ҳусановниң Луис Диасга қаршилик қилиш вақтида операторни ҳам чалиб юбориб, жароҳатлагани ҳамда баҳсдан сўнг узр сўраб, унга ўз футболкасини тақдим этгани, футболчилар ва мухлисларнинг худди японлар каби стадионни чиқиндилардан тозалаб кетишгани, Аббос Файзуллаевнинг дебют голи ва Беҳруз Каримовнинг «пушка»си, мағлубиятдан йиғлаётган болакайни колумбиялик мухлислар овутишгани каби воқеалар сабаб бўлди.

Фабио Каннаваро жамоасининг 2-турда ҳам йўқотадиган нарсаси йўқ. Рақиб ўта кучли. Ҳатто мухлислар-у мутахассислар орасида руҳан мағлубиятга тайёрлар ҳам кўп. Муҳими — биринчи ўйинда бўлгани каби муносиб қаршилик ва жанг таклиф қила олиш. Олдиндаги баҳс йигитларга янада катта машҳурлик олиб келиши мумкин. Масалан, Абдуқодир Ҳусанов ёки Рустам Ашурматов Криштиану Роналдудан тўпни олиб қўйса, Аббос Файзуллаев жаҳоннинг айни вақтдаги энг яхши чап қанот ҳимоячиси Нуну Мендешни алдаб ўтса борми — тармоқлардаги реелсларда (reels) фақат шуларни кўраверамиз.

Ўйиндан аввалги матбуот анжуманида Элдор Шомуродов жамоа босимни ҳис қилмаётганини таъкидлади:

«Бизда босим йўқ. Шу сабабли Португалияга қараганда бизга осонроқ бўлади, деб ўйлайман. Биринчи ўйиндан кейин ишонч бор, аллақочон дебют қилиб бўлдик. Яхши натижа учун майдонга чиқамиз. Колумбияга қарши биринчи бўлимда мураббий кўрсатмаларини тўлиқ бажара олмаганимиз эвазига хатолар келиб чиқди. Португаллларга қарши эса хатоларни такрорламасдан, ўз ўйинимизни кўрсатишга, тўпни кўпроқ назорат қилиб, вазиятлар яратишга ҳаракат қиламиз».

Бош мураббий Фабио Каннаваро эса жамоаси рақибдан қўрқмаслигини айтди:

«Португалиянинг қанотларида жуда кучли футболчилари бор, дунёнинг энг яхши яримҳимоя чизиқларидан бирига эга. Футбол тарихидаги энг яхши ўйинчилардан бири ҳам шу жамоада ўйнайди. Осон бўлмайди. Аммо қўрқмаймиз, ўз режамиз ва стратегиямиз бор. Майдонда айнан ўз ўйинимизни намойиш этишга ҳаракат қиламиз».

Ўзбекистон миллий жамоасининг таркибига келсак, Одил Ҳамробеков, Азиз Ғаниев ва Ҳожиакбар Алижонов каби футболчилар жароҳатдан тўлиқ тикланишган ва майдонга тушишлари мумкин. Биринчи ўйиннинг ёрқин юлдузларидан бири Беҳруз Каримов эса асосан индивидуал тарзда шуғулланди. Унинг Португалияга қарши ўйнаши сўроқ остида. Дебют ўйинда яримҳимоя марказида камчиликлар кузатилганди, шу сабабли Каннаваро маркази кучли Португалияга қарши қандайдир ўзгаришлар қилиши ва марказий яримҳимояга яна бир футболчи қўшиши эҳтимолдан холи эмас.

Рустам Ашурматов ва Достон Ҳамдамов 17 йилдан сўнг Роналду билан учрашади

2009 йили Криштиану Роналду Тошкентга келган ва «Бунёдкор»нинг 13–14 ёшли футболчиларига мастер-класс кўрсатганди. Ўша болакайлар орасида ҳозирда миллий жамоа аъзоси саналган Рустам Ашурматов ва Достон Ҳамдамов ҳам бор эди. Тақдирни қарангки, улар 17 йилдан сўнг жаҳон аренасида португалиялик афсонага қарши майдонга тушишади. ЎФА матбуот хизмати йигитлардан айнан шу ҳақда сўради.

Ашурматов жавобан: «Ўшанда 13 ёшда бўлганмиз. Унинг Тошкентга келиши кутилмаган ҳолат бўлганди. Биз билан футбол ўйнаган, суратларга тушган. Бир кун келиб, мундиалда Роналдуга қарши ўйнашимиз тасаввуримизга сиғмаган. Бу — тарих. Лекин олдиндаги баҳсда нафақат Роналду, бутун Португалия миллий жамоасига қарши жанг қиламиз. 100 эмас, 1000 фоиз боримизни берамиз», деди.

Ҳамдамов эса Роналду унинг кумирларидан бири эканлигини айтди: «Орадан шунча йил ўтиб, Роналдуга қарши ўйнаймиз деб ўйламагандик. Ўша пайтлари биз учун унга қарши ўйнаш орзу бўлган. Унда ёш бола бўлганмиз, Роналду эса кучга тўлган, юлдузлик пайтлари эди. Яна унга қарши ўйнаб, ўша хотираларни эслаймиз. Унинг ўйинларини ёшлигимиздан кузатиб келамиз — жуда кучли футболчи ва бундан кейин ҳам шундай бўлиб қолади. Роналду мен учун кумир, десам ҳам бўлади. Бу қандайдир тушга ўхшайди. Нафақат Роналду, Европанинг топ-клубларида ўйнайдиган футболчиларга қарши ҳаракат қилиш қийин. Лекин иккинчи томондан ёқимли. Яхши қаршилик кўрсатамиз».

Португалия «ошхона»сида нотинчлик

1-турда Конго (1:1) билан дурангдан сўнг Португалия қаттиқ танқидлар остида қолиб кетди. Ҳисоб ўз йўлига, жамоанинг ўйинида мазмун кўринмади. Месси ҳет-трик қилган бир пайтда, Роналдуда деярли имконият юзага келмади. Жаҳоннинг энг яхши яримҳимоясига эга жамоанинг маркази шунчаки тўпни олиб юрди, аммо хавфли вазиятлар ярата олмади.

Кўпчилик жиддий рақиб сифатида кўрмаётган, Ўзбекистон 3-турда ютиши шарт деб қаралаётган Конго ҳам қойилмақом ҳимояланганини таъкидлаш керак. Африкаликлар ҳеч қанақасига аутсайдер эмасликларини исботлашди. Ҳатто жамоа қарши ҳужумларда аниқроқ ҳаракат қилганида, ютиб кетиши ҳам мумкин эди.

Ўйиндан сўнг Криштианунинг ашаддий фанатлари аламларини жамоанинг бошқа ўйинчиларидан олишди. Бруну Фернандеш, Жоау Невеш, Витинянинг инстаграм саҳифалари «портлади». Мухлислар «Роналдуга пас бер», «Қара, Аргентина футболчилари Месси учун ўйнашяпти» каби изоҳлар билан уларнинг саҳифаларини тўлдириб ташлашди. Ҳатто ўтган йили вафот этган Диогу Жотанинг саҳифасига ёзган «ашаддийлар» ҳам бўлди.

Албатта, Криштианунинг ўзи ҳам танқидларга учради. Ҳатто португалияликлар орасида Роналдуни жамоанинг асосий муаммоси сифатида кўрсатаётганлар, бош мураббий Роберто Мартинесни ўйини чиқмаган 41 ёшли юлдузни захирага олмагани учун қўрқоқликда айблаганлар талайгина. Агент Паулу Барбоза «Португалия Роналду билан Ўзбекистонни ҳам юта олмайди» деб ёзди. Криштиану эса танқидларга жавобан машғулотларда жамоадошлари билан тушган суратини жойлаб: «Бирдаммиз» деб пост қолдирди.

Хуллас, бундай гап-сўзлар жамоанинг ички муҳитига қандай таъсир қилиши қизиқ. Агар негативлар жамоага руҳан катта босим бера олса, бу Ўзбекистон миллий жамоасининг фойдасига хизмат қилади. Аксинча бўлиши, португаллар ғазабланиб, бор аламларини бўлажак рақибдан олишга ва 1-турдаги расво ўйинни унуттиришга ҳаракат қилишлари ҳам мумкин. Нима бўлишини бугун, 23 июн куни Тошкент вақти билан соат 22:00 да бошланадиган баҳс орқали билиб оламиз.

Португалияга бўлаётган танқидлар фонида бу ўйин бутун дунёнинг эътиборида. Шундай экан, бу — Ўзбекистон футболчиларига ҳам ўзларини кўрсатиб, «реклама» қилиб олишлари учун ажойиб имконият. Умид қиламизки, йигитлар бундан унумли фойдалана олишади. Олға, Ўзбекистон!