O‘zbekiston beshta davlat bankini xususiylashtirishni rejalashtirmoqda
Yangilangan «O‘zbekiston–2030» strategiyasiga ko‘ra, 2030 yilga borib davlat banklarining bank tizimi aktivlaridagi ulushi sezilarli darajada qisqartiriladi.
O‘zbekiston hukumati bank tizimida davlat ishtirokini bosqichma-bosqich kamaytirishni rejalashtirmoqda. Jamoatchilik muhokamasiga qo‘yilgan yangilangan «O‘zbekiston–2030» strategiyasi loyihasiga muvofiq, 2030 yilga qadar beshta davlat banki xususiylashtiriladi. Natijada davlat ixtiyorida atigi to‘rtta bank qolishi rejalashtirilgan.
Hozirgi kunda to‘qqizta bank davlat tasarrufida faoliyat yuritmoqda. Ular qatoriga O‘zmilliybank, Agrobank, O‘zsanoatqurilishbank, Asakabank, Xalq banki, Biznesni rivojlantirish banki, Mikrokreditbank, Aloqabank va Turonbank kiradi.
2026 yildayoq davlat banklari soni sakkiztagacha qisqaradi, keyingi yillarda esa har yili kamida bitta bank xususiylashtirilishi ko‘zda tutilgan.
Strategiyaga muvofiq, davlat banklarining bank tizimi aktivlaridagi ulushi ham kamaytiriladi. Agar 2026 yilda bu ko‘rsatkich 65 foizni tashkil etgan bo‘lsa, 2030 yilga kelib u 55 foizgacha tushirilishi rejalashtirilgan. 2025 yil 1-dekabr holatiga ko‘ra, davlat ulushi mavjud banklar hissasiga jami aktivlarning 64,53 foizi, ya’ni 576,2 trln so‘m to‘g‘ri kelgan.
Iqtisodchi Otabek Bakirovning fikricha, 2026 yilda Aloqabank yoki Turonbank xususiylashtirilishi mumkin. Shuningdek, davlat banklari aktivlar ulushini qisqartirish rejalariga qarab, O‘zsanoatqurilishbank yoki Asakabank 2028 yilgacha sotilishi ehtimoldan xoli emas.
Ma’lumot uchun, Yevropa tiklanish va taraqqiyot banki xususiylashtirishga tayyorgarlik doirasida Asakabankning 15 foiz aksiyasini sotib oldi va 2026 yilda davlat banki aksiyadorlari tarkibiga kiradi.
Iqtisodiyot va moliya vazirligining moliyaviy strategiyasiga ko‘ra, O‘zsanoatqurilishbankni xususiylashtirishning yakuniy bosqichi 2025–2026 yillarda amalga oshirilishi rejalashtirilgan, qolgan uchta bank esa 2026–2027 yillarda sotuvga chiqarilishi mumkin.
Shu bilan birga, O‘zmilliybank, Agrobank, Mikrokreditbank, Xalq banki va Biznesni rivojlantirish bankini 2026–2028 yillar davomida xususiylashtirish rejalashtirilmagan.
