O‘zbekiston bokschilari MDH o‘yinlarida 10 ta medal qo‘lga kiritishdi

O‘zbekistonning erkaklar boks bo‘yicha terma jamoasi Azerboyjonda o‘tgan Mustaqil Davlatlar Hamdo‘stligi (MDH) o‘yinlarida jami 10 ta medal — 5 ta oltin va 5 ta kumush medalni qo‘lga kiritdi. Bu natija terma jamoa uchun musobaqaning eng muvaffaqiyatli yakunlaridan biri bo‘ldi. Oltin medal sohiblari quyidagilar bo‘ldi: Behruz Rohataliyev (–54 kg) qirg‘izistonlik Erbol Barataxunov ustidan 5:0 hisobida ishonchli g‘alaba qozondi. Bobomurod Boymirzayev (–57 kg) esa raqibi ringga chiqishdan bosh tortgani sababli oltin medalni qo‘lga kiritdi. Dilshod Ahmadjonov (–63 kg) rossiyalik David Karababayevni 3:2 hisobi bilan yengdi. Oybekjon Abdurahimov (–70 kg) Rossiya vakili Albert Kobzevni 5:0 hisobida mag‘lub etdi. Xurshidbek Jo‘rayev (–75 kg) finalda rossiyalik Roman Zaporojets ustidan 4:1 hisobida g‘alaba qozondi. Kumush medal egalari esa quyidagicha: O‘tkirbek Norkosimov (–46 kg) ozarboyjonlik Qardash Rahimovga 2:3 hisobida yutqazdi. Azizbek Shokirjonov (–50 kg) Tojikiston vakili Behruz Umarovga qarshi jangda 0:5 hisobida mag‘lub bo‘ldi. Otbek Nurmuhammadov (–60 kg) ozarboyjonlik Shohin Aslanovga 1:4 hisobida imkoniyatni boy berdi. Kamronbek Hamdamov (–66 kg) rossiyalik Maksim Sobolevga qarshi keskin bellashuvda 2:3 hisobida yutqazdi. Shuningdek, og‘ir vazn toifasida (+80 kg) Farhodjon Bahodirov ham finalga chiqdi, ammo ozarboyjonlik Safar Mammadzodaga qarshi jangda 1:4 hisobida mag‘lub bo‘ldi. O‘zbekiston sportchilari 20 ta oltin, 27 ta kumush va 47 ta bronza — jami 94 ta medal bilan umumjamoa hisobida 4-o‘rinda borishmoqda.