O‘zbekiston Rossiya va Turkmanistondan rekord darajada gaz import qildi

Yanvar-iyun oylarida O‘zbekistonning gaz importi 571,8 mln dollarni tashkil etdi. Bu o‘tgan yilning shu davriga nisbatan 30 foizga kamaygan bo‘lsa-da, may va iyun oylaridagi import hajmi keskin o‘sdi. Masalan, iyun oyida import 286,3 mln dollarga yetdi — bu yil boshidan beri eng yuqori ko‘rsatkich hisoblanadi. Shu davrda O‘zbekiston Xitoyga 354,9 mln dollar qiymatda tabiiy gaz eksport qilgan. Bu o‘tgan yilning shu davriga nisbatan 50 foiz ko‘pdir. Eng katta eksport aprel oyida (105,4 mln dollar) qayd etilgan. May va iyun oylarida bu miqdor so‘ngida biroz kamaygan — mos ravishda 88,3 mln va 66,9 mln dollar. Xitoy Bosh bojxona boshqarmasi ma’lumotlariga ko‘ra esa, O‘zbekistonning gaz eksporti yanvar-may oylarida 365,57 mln dollarni tashkil etgan. Bu mamlakatning milliy statistika organi ma’lumotlaridan farq qiladi. Shuningdek, maydan iyungacha Xitoyga gaz yetkazib berish 12,6 foizga kamaygani qayd etilgan. Xitoy bozorida eng yirik gaz yetkazib beruvchi davlat Rossiya bo‘lib qolmoqda — joriy yilning birinchi yarmida rossiyaliklar 4,89 mlrd dollar qiymatda gaz eksport qilgan. Ikkinchi o‘rinda Turkmaniston —4,21 mlrd dollar, undan keyin Myanma, Qozog‘iston va AQSH kelmoqda. O‘zbekistonning importi va eksportidagi farq ichki ehtiyojning oshib borayotganini va tashqi savdo siyosatining qayta ko‘rib chiqilayotganini ko‘rsatmoqda.