Ўзбекистон терма жамоасининг Жаҳон чемпионати либосларида Adidas матосидан нусха олингани айтилмоқда

Ўзбекистоннинг маҳаллий «7SABER» бренди томонидан Ўзбекистон миллий терма жамоасининг ЖЧ-2026 учун мўлжалланган уй ва сафар либослари матоси «Adidas» компаниясининг 2026 йилги жаҳон чемпионати учун ишлаб чиққан янги матосига жуда ўхшаш. Бу ҳақда футбол формалари дизайнига ихтисослашган «Footy Headlines» нашри ёзмоқда.

Мақолада таъкидланишича, янги оқ рангли сафар либосининг макросуратлари матонинг тузилишини очиқ кўрсатган. «7SABER» логотипи атрофидаги материал ҳаво ўтказиш ва намликни тортишга мўлжалланган бўлиб, унда ўзига хос учта чизиқли текстурали тўқима мавжуд.

Бу тўқима нақши немис компанияси 2025 йилнинг ноябрида тақдим этган оригинал технологик андозага тўлиқ мос келиши айтилган. Натижада, кузатувчилар ўзбек бренди «Adidas»нинг технологик лойиҳасидан тўғридан-тўғри нусха кўчирган, деган хулосага келишган.

Матонинг келиб чиқиши ва саноатдаги ҳолат

Қайд этилишича, замонавий спорт кийимларини ишлаб чиқариш саноатида кичик мустақил брендларнинг йирик компаниялар материалларига ташқи кўринишидан ўхшаш матолардан фойдаланиши одатий ҳолат. Бунга «Nike» компаниясининг «Vaporknit» матоси бошқалар томонидан кенг кўчирилгани мисол қилиб келтирилган.

Шундай бўлса-да, мақолада икки бренд матолари ўртасидаги жисмоний ўхшашликни инкор қилиб бўлмаслиги таъкидланган. Маълум қилинишича, бу каби тўқима нақшлари йирик брендларнинг матоларини кўчириб босадиган хорижий ишлаб чиқарувчилар орқали сотилади. «Footy Headlines» нашрининг тахминича, «7SABER» ёки унинг буюртмасини бажарувчи завод ушбу мато нусхасини айнан ўша хорижий ишлаб чиқарувчилар орқали қўлга киритган.