O‘zbekiston va Italiya strategik sheriklikni mustahkamlaydi

Samarqandda O‘zbekiston Prezidenti Shavkat Mirziyoyev va Italiya Bosh vaziri Jorja Meloni o‘rtasida o‘tgan muzokaralar yakunida strategik sheriklikni mustahkamlash bo‘yicha qo‘shma deklaratsiya imzolandi. Bu ikki mamlakat munosabatlarida yangi bosqichni boshlab berdi. Tashrif doirasida migratsiya, xomashyo, investitsiya, atrof-muhit, madaniy meros va «yashil» rivojlanish sohalarida hamkorlikka oid muhim bitimlar tuzildi. Jumladan, Italiyaning «Sogesid» va «Ansaldo» kompaniyalari, Iqlim jamg‘armasi hamda Qishloq xo‘jaligi konfederatsiyasi bilan kelishuvlar amalga oshirildi. Ta’lim sohasida Tushia, Piza va Turin universitetlari bilan sheriklik to‘g‘risidagi bitimlar almashildi. Qolaversa, Italiya Milliy tadqiqotlar markazi, Peruja universiteti, «SIMEST» va «Danieli» kompaniyalari bilan ham qator hujjatlar imzolandi. Italiya delegatsiyasining tashrifi ikki tomonlama hamkorlikni rivojlantirish, savdo-iqtisodiy aloqalarni kengaytirish va mintaqaviy barqarorlikni ta’minlash maqsadlariga xizmat qilmoqda. Tomonlar o‘zaro manfaatli loyihalarni amalga oshirishga kelishib oldilar. Samarqanddagi rasmiy uchrashuvlar O‘zbekiston va Italiya munosabatlarida muhim burilish nuqtasi bo‘ldi. Muzokaralar natijasida imzolangan bitimlar kelgusida siyosiy, iqtisodiy va madaniy sohalarda yanada keng qamrovli hamkorlikka zamin yaratadi.