O‘zbekiston va Vengriya AES bo‘yicha hamkorlikni kuchaytirdi

O‘zbekiston va Vengriya o‘rtasida atom elektr stansiyasi qurilishi loyihasi doirasida hamkorlikni yanada kengaytirish maqsadida bayonnoma imzolandi. «O‘zatom» agentligi mazkur hujjat atom energetikasi sohasidagi ko‘p tomonlama aloqalarni mustahkamlashda muhim bosqich bo‘lganini ta’kidladi. Bayonnoma Vengriya delegatsiyasining Toshkentga amaliy tashrifi davomida imzolandi. Unga ko‘ra, «O‘zatom» agentligi, Vengriya Tashqi ishlar va savdo vazirligi hamda MVM EGI Zrt. kompaniyasi o‘rtasida qator yo‘nalishlarda kelishuvlarga erishildi. Hujjatda mexanik tortish kuchiga asoslangan quruq sovutish tizimlarini qo‘llash, uskunalar yetkazib berish bo‘yicha texnik va tijorat takliflarini tayyorlash, shuningdek, O‘zbekistonda qurilmalarni yirik uzelli yig‘ishni yo‘lga qo‘yish nazarda tutilgan. Bundan tashqari, Vengriya tomoni ta’lim va stajirovka dasturlarini ishlab chiqish orqali malakali mutaxassislar tayyorlashni ko‘zda tutmoqda. Mazkur tashabbus ikki davlat o‘rtasidagi strategik sheriklikni mustahkamlashga xizmat qilishi kutilmoqda. Shu bilan birga, mintaqa miqyosida barqaror va ilg‘or atom energetikasini rivojlantirishda ham muhim ahamiyat kasb etadi.