O‘zbekistonda 2025 yilda eng ko‘p qanday avtomobillar ishlab chiqarildi?
O‘tgan yili O‘zbekistonda yengil avtomobillar ishlab chiqarish hajmi oshib, «Cobalt» modeli yetakchi o‘rinni saqlab qoldi.
2025 yilda O‘zbekistonda jami 457 ming 883 dona turli rusumdagi yengil avtomobil ishlab chiqarilgan. Milliy statistika qo‘mitasiga ko‘ra, bu ko‘rsatkich 2024 yilga nisbatan 28,7 ming donaga ko‘p bo‘lgan.
Ishlab chiqarishda «Cobalt» yetakchi bo‘ldi
Ishlab chiqarilgan avtomobillar tarkibida «Cobalt» modeli eng katta ulushga ega bo‘ldi. 2025 davomida ushbu rusumda 161 ming 152 dona avtomobil konveyerdan chiqqan. Bu natija «Cobalt»ning ichki bozorda talab yuqoriligini va ommaviy model sifatida o‘z mavqeyini mustahkam saqlayotganini anglatadi.
Boshqa rusumlar ko‘rsatkichi
Ishlab chiqarish hajmi bo‘yicha ikkinchi o‘rinda 93 ming 681 dona bilan «Damas» joy olgan. Undan keyin «Tracker» (50 ming 362 dona) va «Onix» (33 ming 122 dona) modellari kelmoqda. Shuningdek, «KIA» (26 ming 317 dona), «BYD» (20 ming 200 dona), «Chery» (9 ming 354 dona) va «Haval» (9 ming 344 dona) avtomobillari ham ishlab chiqarilgan. Kam miqdorda «Tank» 500 modeli (50 dona) va 54 ming 301 dona maxsus yengil avtomobillar tayyorlangan.
Savdo hajmi va bozor ulushi
Ma’lumotlarga ko‘ra, 2025 yilda mahalliy avtomobil ishlab chiqaruvchi kompaniyalar jami 427 ming 97 ta avtomobil sotgan. Bu 2024 yilga nisbatan 24 ming 706 taga yoki 6,1 foizga ko‘pdir. Shu bilan birga, «UzAuto Motors»ning bozordagi ulushi 87,9 foizdan 84,2 foizgacha qisqargan
