O‘zbekistonda 50 yil ichida kuzatilmagan hodisa yuz berdi — «O‘zgidromet»
Ob-havo xizmati joriy yilning may oyi bo‘yicha yakuniy meteorologik hisobotni e’lon qildi.
© RBC2026 yil may oyi O‘zbekistonda nisbatan iliq va seryog‘in ob-havo bilan o‘tdi.
«O‘zgidromet» ma’lumotlariga ko‘ra, oy davomida mamlakatning aksariyat hududlarida havo harorati iqlim me’yoridan 1–2 daraja yuqori bo‘ldi. Ko‘pchilik kunlarda maksimal harorat 27–32 daraja atrofida kuzatilgan bo‘lsa, ayrim kunlarda 39 darajagacha, janubiy va cho‘l hududlarida esa 40–42 darajagacha ko‘tarildi.
Mutaxassislarning ta’kidlashicha, 2026 yil may oyi harorat tartibi bo‘yicha ham tarixiy ahamiyatga ega bo‘ldi. U 2025 yil mayiga nisbatan ancha yumshoq kechib, O‘zbekistondagi meteorologik kuzatuvlar tarixidagi eng iliq may oyi sifatida qayd etildi.
50 yillik rekordlar yangilandi
May oyining asosiy xususiyati yog‘ingarchilik miqdorining keskin oshgani bo‘ldi. Agar 2025 yil mayi ekstremal quruq kechgan bo‘lsa, bu yil mamlakatning katta qismida yog‘ingarchilik me’yordan yuqori bo‘ldi.
Ayrim hududlarda bir kecha-kunduzda yoqqan yomg‘ir miqdori oylik me’yorning 100–150 foiziga yetdi.
Nukusda bir kecha-kunduzda 40 millimetr yog‘in yog‘ib, oylik me’yorning 348 foizini tashkil qildi.
Angren, G‘uzor va Nukus meteostansiyalarida esa may oyi uchun bir kecha-kunduzlik maksimal yog‘ingarchilik bo‘yicha tarixiy rekordlar yangilandi.
Sel va suv toshqinlari
Kuchli jalalar natijasida Toshkent, Samarqand, Jizzax, Navoiy, Qashqadaryo, Surxondaryo, Farg‘ona va Namangan viloyatlarida bir necha marta sel va suv toshqinlari sodir bo‘ldi.
Respublikaning ayrim hududlarida may oyida bunday kuchli yomg‘irlar 50 yil ichida birinchi marta kuzatilgan.
Shu bilan birga, mamlakatning shimoliy, cho‘l va ayrim vodiy hududlarida yog‘ingarchilik oylik me’yorga yetmagan.
