O‘zbekistonda banklar raqobati yetarli emas — Markaziy bank
So‘nggi ikki yarim yil ichida O‘zbekistonda yangi bank ochilmaganiga qaramay, bozordagi raqobat yetarli darajada emas. Markaziy bankning asosiy maqsadi — raqobat muhitini sifat jihatdan yaxshilash.
Markaziy bank asosiy stavka bo‘yicha matbuot anjumanida banklar o‘rtasidagi raqobat masalasiga alohida to‘xtalib o‘tdi. Xususan, oxirgi 2,5 yil ichida mamlakatda birorta ham yangi bank ochilmagan, ammo mijozlar soni yildan-yilga ko‘payib bormoqda.
Oxirgi marta 2023 yil may oyi boshida «Yangi bank» litsenziya olgan edi. Shu yilning avgust oyida esa «Yevroosiyo bank» litsenziyasi bekor qilingach, banklar soni 35 taga kamaydi.
Markaziy bank ma’lum bir miqdorda banklar sonini ta’minlashni maqsad qilmagan. Tashkilot uchun asosiy ustuvorlik — bozorda raqobat sifatini oshirishdir.
«Hatto mavjud banklar soni bilan ham yetarli darajada raqobatni ko‘rmayapmiz. Deyarli barcha banklar bir xil siyosat yuritmoqda. Biroq biz bu sohada o‘zgarishlar bo‘lishiga umid qilamiz. Men uchun banklar soni emas, raqobat muhitining sifati muhim», — deyiladi bayonotda.
Shuningdek, Markaziy bank to‘lov texnologiyalari bilan shug‘ullanuvchi fintex kompaniyalarini qo‘llab-quvvatlashni taklif etdi. Regulyator ularga ayrim bank xizmatlarini ko‘rsatish imkonini berishni rejalashtirmoqda.
Yana bir yo‘nalish — islomiy moliya tizimini rivojlantirish. Bu banklar an’anaviy moliya muassasalarining o‘rnini bosuvchi emas, balki fuqarolar uchun qo‘shimcha imkoniyat sifatida qaralmoqda.
Avvalroq mikromoliya tashkilotlariga islomiy moliya xizmatlarini ko‘rsatishga ruxsat berilgani hamda O‘zbekistonda to‘laqonli islomiy bank faoliyati haqidagi qonun deputatlar tomonidan ma’qullangani xabar qilingan edi.
