O‘zbekistonda hafta davomida harorat +20 darajagacha pasayadi

Ish haftasi davomida O‘zbekiston hududi Janubiy Qozog‘iston ustidagi yuqori siklon bilan bog‘liq bo‘lgan salqin va nam havo massalari ta’siri ostida bo‘ladi, deb xabar bermoqda O‘zgidromet. Bu holat sababli ayrim hududlarda qisqa muddatli yomg‘ir va momaqaldiroq kuzatilishi mumkin. Bugun Navoiy viloyati shimolida yomg‘ir yog‘ishi ehtimol qilinmoqda. Shuningdek, kechga tomon hamda 16 sentyabr kuni kechasi va ertalab Toshkent viloyatida qisqa muddatli yomg‘ir va momaqaldiroq bo‘lishi mumkin. Farg‘ona vodiysida 16 sentyabr kechqurundan 19 sentyabrgacha tanaffus bilan yomg‘ir yog‘ishi kutilmoqda. Qolgan hududlarda havo asosan quruq bo‘ladi. Tog‘ oldi va tog‘li hududlarda hafta davomida yomg‘ir kuzatiladi. 16 sentyabr kuni ayrim baland hududlarda kuchli yomg‘ir yog‘ishi va yuqori tog‘larda yomg‘ir qorga aylanishi mumkin. Havo harorati asta-sekin pasayib, hafta o‘rtalarida kundagi ko‘rsatkichlar +20...+25 darajani tashkil etadi. 19 sentyabrdan esa salqin havo massasi chekinib, harorat +2...+3 daraja ko‘tariladi. Shamol ba’zi joylarda sekundiga 13–18 metrgacha kuchayishi, ayrim hududlarda esa chang-to‘zon ko‘tarilishi mumkin. Toshkent shahrida asosan yomg‘irsiz havo kutilmoqda. Faqatgina 15 sentyabr kechqurun hamda 16 sentyabr kuni kechasi va ertalab qisqa muddatli yomg‘ir yog‘ishi ehtimoli bor. Kundagi harorat bugun +27...+29 daraja, 16–18 sentyabr kunlari esa +20...+25 darajagacha pasayib, 19 sentyabrda +25...+27 daraja atrofida bo‘lishi kutilmoqda.