O‘zbekistonda ikkilamchi bozordagi uylar yana qimmatlashdi, Toshkentda esa narx tushdi
12.09.2025 | 18:0049763
Iqtisodiy tadqiqotlar va islohotlar markazi (ITIM) hisobotiga ko‘ra, avgustda uy narxlari o‘rtacha 1 foizga oshgan, Toshkentda esa ayrim tumanlarda pasayish qayd etildi.
ITIM ma’lumotiga ko‘ra, 2025 yil avgust oyida O‘zbekistonda ikkinchi bozordagi uy-joy narxlari o‘rtacha 1 foizga oshgan. Bu joriy yilning iyulidagi 1,7 foizlik o‘sishga nisbatan sekinlashuvni anglatadi. Yillik hisobda o‘sish 4 foizni tashkil etdi, deb xabar bermoqda Spot.uz.
Eng katta narx o‘sishi Surxondaryo (+17 foiz), Jizzax (+14 foiz) va Sirdaryo (+10 foiz) viloyatlarida qayd etildi. Shu bilan birga, Toshkentda ikkinchi bozordagi uylar avgustda atigi 0,2 foizga qimmatlashgan, yillik hisobda esa 2,3 foizga arzonlashgan.
Poytaxtning ayrim tumanlarida pasayish aniq ko‘zga tashlandi: Mirzo Ulug‘bek (-6,3 foiz), Chilonzor (-4,6 foiz) va Yashnobod (-4,4 foiz). Bunga zid o‘laroq, yangi qurilgan uylar narxi ko‘proq o‘sgan — Mirobodda +6,6 foiz, Yakkasaroyda +3,6 foiz va Olmazorda +2,6 foizga.
Umumiy bozor faolligi ham biroz pasaygan — avgustda 25 mingta bitim rasmiylashtirildi, bu iyulga nisbatan 4,6 foizga kam. Biroq yillik hisobda talab 13 foizga oshgan. Sirdaryo, Xorazm va Surxondaryoda sotuvlar 27–34 foizga ko‘paygan. Toshkentda esa yil boshidan buyongi eng yuqori faollik qayd etilgan.
