O‘zbekistonda QQS qaytarilishi 17 foizga kamaydi

Soliq qo‘mitasi ma’lumotiga ko‘ra, 2025 yil yanvar–iyun oylarida O‘zbekistonda qo‘shilgan qiymat solig‘ini (QQS) qaytarish hajmi 17,7 foizga kamayib, 8,79 trln so‘mni tashkil etdi. Bu 2024 yilning shu davridagi 10,69 trln so‘mlik ko‘rsatkichdan kam. QQS qaytarish bo‘yicha jami 5488 ta ariza qabul qilingan bo‘lib, ular 3272 ta kompaniya tomonidan yuborilgan. Arizalar soni 18,2 foizga, ariza beruvchi sub’ektlar soni esa 16,9 foizga ko‘payganiga qaramay, o‘rtacha qaytarilgan summa 1,6 mlrd so‘mni tashkil etdi — bu o‘tgan yilning birinchi yarmiga nisbatan 30,4 foiz kam. Eksport bilan shug‘ullanuvchi kompaniyalar umumiy qaytarilgan QQSning 3,13 trln so‘mini tashkil qildi — 32,8 foiz o‘sish qayd etilgan. Bu toifadagi arizalar soni 3089 taga yetdi, eksportchilar soni esa 1,4 mingdan oshdi. Eng katta qaytarish sanoat sohasiga to‘g‘ri keldi — 5,99 trln so‘m (+15,4%). Hizmatlar sohasida esa QQS qaytarilishi 956,2 mlrd so‘mgacha tushgan (–29,2%), transport sohasida esa 641,4 mlrd so‘mlik qaytarish amalga oshirilgan, bu 3,3 baravar o‘sishni anglatadi. Soliq qo‘mitasi raisi Sherzod Kudbiyevning ta’kidlashicha, QQSni qaytarishda xatoga yo‘l qo‘yilsa, javobgarlik yuzaga keladi — shu bois, bu jarayon sezgir hisoblanadi. Uning so‘zlariga ko‘ra, 32 nafar soliqchi QQS qaytarishda yo‘l qo‘ygan qoidabuzarliklar uchun jinoiy javobgarlikka tortilgan. Kudbiyev tadbirkorlarga QQSni avtomatik tartibda qaytarish imkonini beruvchi «AAA» reytingiga erishishni tavsiya etdi. 2024 yil davomida Soliq qo‘mitasi jami 22,8 trln so‘mlik QQSni qaytargan — 2023 yilga nisbatan 15,9 foizga ko‘p.