O‘zbekistonda QQS qaytarishdagi xatolar uchun 32 nafar soliqchi jinoiy javobgarlikka tortildi

Kudbiyevning ma’lum qilishicha, hozirgacha 32 nafar soliq organi xodimi QQSni qaytarishdagi qonunbuzarliklar, xususan, poraxo‘rlik va rasmiy xatolar uchun jinoiy javobgarlikka tortilgan. Ushbu muloqot chog‘ida logistika kompaniyasi vakili fevraldan beri 750 mln so‘m QQS summasini qaytarish imkoni bo‘lmayotganini bildirdi. Unga ko‘ra, kamchiliklar bartaraf etilganiga qaramay, soliq idorasi hali ham javob qaytarmagan. Kudbiyev bu jarayonni ortiqcha byurokratiya bilan qiyoslab, shunday deydi: «Inspektor muzdek suv shishasini olib, uning sovuq ekanini tasdiqlovchi rasmiy ma’lumot talab qiladi». U soliqchilarga murojaat qilib, muammoning sababini aniqlashni, o‘rinsiz talablar yoki poraxo‘rlik holatlariga chek qo‘yishni topshirdi. QQS avtomatik qaytarilishini ta’minlash uchun Kudbiyev tadbirkorlarni o‘z kompaniya reytingini eng yuqori «AAA» darajaga olib chiqishga chaqirdi. Bu holda soliq tekshiruvi uchun hatto farmoyish ham chiqarib bo‘lmaydi. Eslatib o‘tamiz, may oyi oxirida Davlat xavfsizlik xizmati QQS qaytarish tizimi orqali 82 mlrd so‘m mablag‘ni soxta reytinglar yordamida talon-taroj qilish holatini fosh etgan edi.