Ўзбекистонда хорижий компаниялар сони илк бор 20 мингдан ошди

Ўзбекистонда хорижий капитал иштирокидаги корхоналар сони илк бор 20 мингдан ошди. Миллий статистика қўмитаси маълумотларига кўра, 2026-йил 1-июл ҳолатига мамлакатда таъсисчилари норезидент бўлган 20 502 та компания фаолият юритмоқда. Бу ўтган йилнинг шу даврига нисбатан 3817 тага ёки 22,9 фоизга кўп.

Фаолият юритаётган корхоналарнинг 15 891 таси тўлиқ хорижий капитал иштирокидаги компаниялар бўлиб, уларнинг сони бир йилда 26,5 фоизга ошган. Қўшма корхоналар эса 4611 тага етган. Бу кўрсаткич ҳам йил давомида 487 тага кўпайган.

Хорижий инвесторлар иштирокидаги компаниялар сони бўйича Хитой етакчиликни сақлаб қолмоқда. Ҳозирда мамлакатда хитойликлар иштирокидаги 6060 та компания фаолият юритмоқда. Бу умумий кўрсаткичнинг қарийб 30 фоизини ташкил этади. Сўнгги бир йил ичида уларнинг сони 1868 тага ёки 44,5 фоизга ошган.

Иккинчи ўринда 3454 та компания билан Россия жойлашган. Ундан кейин Туркия 2293 та компания билан учинчи ўринни эгаллаган. Кейинги ўринларда Қозоғистон (1307 та), Жанубий Корея (725 та) ва Афғонистон (685 та) қайд этилган.

Шунингдек, Озарбайжон иштирокидаги компаниялар сони бир йил ичида 59,2 фоизга ошиб, 473 тага етди. Биринчи ўнталикдан, шунингдек, БАА, Тожикистон ва Ҳиндистон ҳам ўрин олган.

Энг юқори ўсиш суръати эса Покистон ҳиссасига тўғри келди. Бир йил ичида покистонликлар иштирокидаги компаниялар сони 170 тадан 325 тагача ошиб, 91 фоизлик ўсишни қайд этди.

Фаолиятлар кесимида

Фаолият соҳалари кесимида савдо етакчиликни сақлаб қолмоқда — 7289 та компания айнан шу тармоқда ишлайди. Иккинчи ўринда саноат соҳаси 4031 та корхона билан қайд этилган. Шу билан бирга, ИТ соҳаси илк бор қурилишни ортда қолдирди. Ҳозирда ахборот технологиялари соҳасида 1690 та, қурилишда эса 1689 та хорижий капитал иштирокидаги компания фаолият юритмоқда.