O‘zbekistondagi avtotransportlar soni 4,5 milliondan oshdi
14.07.2025 | 13:3427692
2025 yil 1 aprel holatiga ko‘ra, O‘zbekistonda jismoniy shaxslar egaligidagi avtotransport vositalari soni 4,5 milliondan oshgan. Ularning mutlaq ko‘pchiligi yengil avtomobillardan iborat bo‘lib, yil boshidan beri avtomobillar soni 79,8 mingtaga ko‘paygan.
Milliy statistika qo‘mitasi ma’lumotlariga ko‘ra, 2025 yilning 1 apreligacha mamlakatda jismoniy shaxslarga tegishli 4 522,1 mingta avtotransport vositasi ro‘yxatdan o‘tkazilgan. Ular ichida eng katta ulushni — 93 foizni — yengil avtomobillar tashkil etadi.
Yil boshidan buyon ro‘yxatdan o‘tkazilgan avtotransportlar soni 79,8 mingtaga oshgani qayd etilgan. Bu tendensiya yurtimizda shaxsiy avtomashinalarga bo‘lgan talab ortib borayotganini ko‘rsatadi.
Mazkur davrda jismoniy shaxslar egaligidagi avtotransport vositalarining turlari bo‘yicha taqsimoti quyidagicha: yengil avtomobillar – 4 207,6 mingta, yuk mashinalari – 293,3 mingta, mikroavtobuslar – 7,7 mingta, maxsus transport vositalari – 7,4 mingta, avtobuslar – 6,1 mingta.
Ushbu ko‘rsatkichlar O‘zbekistonda avtomashinalar parki doimiy ravishda yangilanib, kengayib borayotganini, shu bilan birga yo‘l infratuzilmasini rivojlantirish zarurati yanada ortib borayotganini anglatadi.
