«O‘zbekneftgaz» rahbariga ikki yangi o‘rinbosar tayinlandi

«O‘zbekneftgaz» AJda boshqaruv tarkibida yangi tayinlovlar amalga oshirildi. Kompaniya boshqaruv raisi o‘rinbosarligiga ikki mutaxassis tayinlanib, strategik yo‘nalishlar qayta taqsimlandi. Yangi qarorlar moliyaviy transformatsiya va qayta ishlash segmentini kuchaytirishga qaratilgani aytilmoqda.

Suhrob Hamrayev «O‘zbekneftgaz» boshqaruv raisi birinchi o‘rinbosari — moliya, transformatsiya va xususiylashtirish masalalari bo‘yicha lavozimga tayinlandi. U investitsiya va infratuzilmaviy loyihalar ekspertizasi, texnik-iqtisodiy asoslanmalarni baholash hamda yirik ishlab chiqarish tashabbuslarini amalga oshirish sohasida ko‘p yillik tajribaga ega. Turli yillarda vazirlik va respublika darajasidagi davlat idoralari, ekspert agentliklari hamda neft-gaz va energetika tarmoqlarida mas’ul lavozimlarda faoliyat yuritgan.

Kompaniya ma’lumotlariga ko‘ra, yangi lavozim doirasida moliyaviy samaradorlikni oshirish, aktivlarni optimallashtirish va xususiylashtirish jarayonlarini jadallashtirish ustuvor vazifa sifatida belgilangan. Bu esa kompaniyaning bozor islohotlari va institutsional o‘zgarishlar bosqichida muhim ahamiyat kasb etadi.

Abrorjon Xudoyberganov esa «O‘zbekneftgaz» boshqaruv raisi o‘rinbosari — qayta ishlash yo‘nalishi bo‘yicha lavozimga tayinlandi. U neft va gazni qayta ishlash qurilmalari, innovatsion loyihalar hamda zamonaviy texnologiyalarni ishlab chiqarish jarayonlariga joriy etish sohasida tajribali mutaxassis hisoblanadi. Mehnat faoliyatini qurilma kuzatuvchisi sifatida boshlab, bosqichma-bosqich rahbarlik lavozimlarigacha ko‘tarilgan.

Kuzatuvchilar fikricha, bu tayinlovlar kompaniyada ishlab chiqarish samaradorligini oshirish, qayta ishlash quvvatlarini modernizatsiya qilish va korporativ boshqaruvni takomillashtirishga xizmat qiladi.