Paxtachida bolalar avtobusga mindirilmagan video ortidan hokimlik bepul qatnov joriy etdi

Ijtimoiy tarmoqlarda katta muhokamalarga sabab bo‘lgan voqea 3 sentyabr kuni Samarqand viloyati Paxtachi tumani Fay mahallasiga qarashli Nazarobod qishlog‘ida sodir bo‘lgan. «Oqtosh-Shaxzod trans» MCHJga tegishli avtobus haydovchisi yo‘lkira haqini to‘lamagan o‘quvchilarni transportga mindirmagan. Holat yuzasidan viloyat hokimligi rasmiy munosabat bildirdi. Davlat raqami 30 E 881HB bo‘lgan avtobus, «Saxoba-Oqtosh» yo‘nalishida qatnagan. Shu voqeadan so‘ng haydovchi Musurmon Bobojonov jamiyatning 4 sentyabrdagi buyrug‘i bilan ishdan bo‘shatilgan. Hokimlik ma’lumotlariga ko‘ra, Nazarobod qishlog‘idan 19 nafar o‘quvchi Paxtachi tumanidagi 28-maktabga, yana 3 nafar o‘quvchi esa 34-maktabga qatnab o‘qiydi.

«Paxtachi tumani hokimligi va«Oqtosh-Shaxzod trans» MCHJ o‘rtasida maktab o‘quvchilarini maktabga tashish xizmatini yo‘lga qo‘yish bo‘yicha shartnoma imzolanib, kunning ikkinchi yarmidan boshlab o‘quvchilar uchun bepul avtobus harakati yo‘lga qo‘yilganligini ma’lum qilamiz» — deyiladi xabarda.

Viloyat hokimligi bunday holatlarning takrorlanmasligi uchun choralar ko‘rilayotganini va muammoni ko‘targan ijtimoiy tarmoq faollariga minnatdorlik izhor etdi.