Pentagon Xitoyning harbiy salohiyati bo‘yicha hisobot e’lon qildi
AQSH Mudofaa vazirligi Xitoy Xalq Respublikasining harbiy qudrati haqidagi an’anaviy yillik hisobotini taqdim etdi. Hujjatda 2024 yil yakunigacha bo‘lgan ma’lumotlar asosida Xitoy armiyasi rivojlanishi, qurollanish jarayoni va mintaqaviy ustunlik harakatlari batafsil yoritilgan.
Hisobotga ko‘ra, Xitoy harbiy sohada yuqori sur’atlarda modernizatsiya jarayonlarini davom ettirmoqda. Jumladan, gipertovushli qurollar, sun’iy intellektga asoslangan tizimlar, uzoq masofali ballistik raketalar hamda zamonaviy aviabardorlar soni oshgan. Shuningdek, yadroviy salohiyati ham kengaygani qayd etilgan.
Pentagon Xitoyni AQSHning global raqibi sifatida ko‘rsatib, uning Tayvan bo‘yicha ambitsiyalarini xavfli deb baholagan. Hisobotda ta’kidlanishicha, Xitoy harbiylari Tayvan orolini bosib olish imkoniyatini nazariy jihatdan to‘liq o‘rganib chiqqan bo‘lishi mumkin.
Bundan tashqari Xitoyning kiberqudrati va elektron razvedka sohasidagi yutuqlari ham tahlil qilingan. Pentagon Xitoyning texnik infratuzilmasi va sun’iy intellektga asoslangan harbiy dasturlarini jiddiy tahdid sifatida baholagan.
Xitoy tomoni ushbu hisobotlarga doimiy ravishda raddiya berib keladi. Pekin Vashingtonni harbiy muvozanatni buzishda ayblab, bu kabi tahlillar ikki davlat o‘rtasidagi ishonchni susaytirishini ta’kidlagan.
