Pokiston va Afg‘oniston otashkesim bo‘yicha kelishuvga erishdi

Bugun, 15 oktyabr kuni Pokiston Afg‘onistonning Qandahor viloyatiga havo hujumi uyushtirdi. Afg‘oniston va Pokiston rasmiy vakillari ma’lumotlariga ko‘ra, hujumdan so‘ng ikki mamlakat o‘rtasida vaqtinchalik o‘t ochishni to‘xtatish bo‘yicha kelishuvga erishilgan. Bu haqda The Independent nashri xabar bermoqda. Islomobodning ma’lum qilishicha, Pokiston va Kobuldagi «Tolibon» hukumati qo‘shni mamlakatlar o‘rtasidagi yangi to‘qnashuvlardan so‘ng 15 oktyabr kuni mahalliy vaqt bilan soat 17:30 da (Grinvich bo‘yicha soat 13:00) boshlanadigan 48 soatlik otashkesim kelishuviga erishgan. Pokiston Tashqi ishlar vazirligi har ikki tomon samimiy sa’y-harakatlar qilishini va muloqot orqali murakkab, ammo hal etsa bo‘ladigan vaziyatga ijobiy yechim topishga intilishini ta’kidlagan. Kelishuvga chorshanba kuni beqaror Pokiston-Afg‘oniston chegarasida yana jangovar harakatlar boshlanib, o‘nlab tinch aholi va harbiy xizmatchilar halok bo‘lganidan so‘ng, dam olish kunlari o‘nlab odamlarning hayotiga zomin bo‘lgan to‘qnashuvlardan keyin o‘rnatilgan nozik tinchlik buzilganidan keyin erishildi. Dam olish kunlari sodir bo‘lgan to‘qnashuvlar 2021 yilda Kobulda «Tolibon» hokimiyat tepasiga kelganidan beri ikki davlat o‘rtasidagi eng shiddatli to‘qnashuv bo‘ldi.