«Pul yo‘q, lekin bu yashirilmoqda»: «Sberbank» 13,5 ming xodimni ishdan bo‘shatdi

Frank RG ma’lumotlariga ko‘ra, «Sberbank» 2025 yil davomida shtatni 13,5 ming xodimga qisqartirdi. Xalqaro moliyaviy hisobot standartlari (MSFO) bo‘yicha ma’lumotlarga ko‘ra, yilning birinchi choragida bank 8,6 ming, ikkinchi chorakda 3,5 ming, uchinchi chorakda esa 1,4 ming ish o‘rnini qisqartirgan. Natijada bank xodimlari soni 2023 yil darajasidan pastlab, 295,9 ming nafarga tushdi.

Qisqartirishlar asosan IT mutaxassislariga tegishli bo‘ldi. Bu jarayon qish oylaridayoq boshlangan va asosan «Sber» ekotizimi tarkibidagi loyihalar — «Megamarket», «Samokat», «Kuper» va «Sberlogistika»ga ta’sir etgan. «Vedomosti» nashri manbalariga ko‘ra, menejment xarajatlarni qisqartirib, moliyaviy natijalarni yaxshilashni maqsad qilgan.

The Bell manbasi so‘zlariga ko‘ra, «Iqtisodiyot og‘ir ahvolda, pul yo‘q, lekin bu yashirilmoqda», — deb ta’kidlagan bozor ishtirokchisi. Shu bilan birga, «Sberbank»dan keyin boshqa yirik kompaniyalar — VK va MTS ham IT xodimlarini qisqartirishga majbur bo‘lgan.

Avgust oyida «Sberbank» markaziy apparatidagi 40 ming xodimning 20 foizini ishdan bo‘shatish haqida qo‘shimcha qaror qabul qilgan. CNews ma’lumotlariga ko‘ra, ba’zi bo‘limlarda rahbar va bir-ikki asosiy mutaxassisdan tashqari barcha ishchilar qisqartirilgan.

Bank rahbariyati buni sun’iy intellektni joriy etish bilan izohlamoqda. Biroq ko‘pchilik ekspertlar bu bahonani ishonchsiz deb hisoblab, aslida maqsad xarajatlarni keskin qisqartirish ekanini aytishmoqda.

Shu bilan birga, Sberbank moliyaviy jihatdan faol foyda ko‘rmoqda: 2025 yilning uchinchi choragida bank 448,3 mlrd rubl sof foyda olgan — o‘tgan yilga nisbatan 9 foiz ko‘p. Yanvar–sentyabr oylarida esa foyda 1,307 trln rublni tashkil etgan (+6,5 foiz).

Bankning sof foizli daromadlari yillik hisobda 17,3 foizga o‘sib, 893,6 mlrd rublga yetdi. Kredit portfeli esa 5,1 foizga oshib, 48,4 trln rublni tashkil etdi.