Путин: «Москванинг Ереванга фақат битта илтимоси бор»
Россия президентининг айтишича, Пашинянни қўллаб-қувватловчи сиёсий кучлар анчадан буён Ғарб стандартлари тарафдори бўлиб келган.
Россия президенти Владимир Путин Санкт-Петербург халқаро иқтисодий форуми доирасида дунёнинг етакчи ахборот агентликлари раҳбарлари билан учрашувда Арманистоннинг Европа Иттифоқига қўшилиш истиқболлари ҳақида фикр билдирди.
Унинг таъкидлашича, Москва Еревандан ушбу масала бўйича аниқ позицияни имкон қадар тезроқ белгилаб олишни сўрамоқда.
«Бош вазир Пашиняннинг ўзи яқинда ушбу масала бўйича [Арманистоннинг Европа Иттифоқига қўшилиши ҳақида] референдум ўтказиш зарур деб ҳисоблашини айтган эди. Бизда фақат битта илтимос бор — буни иложи борича тезроқ амалга оширинг», — деди Россия раҳбари.
Москва аниқлик истамоқда
Россия президентининг сўзларига кўра, Москва арманистонлик ҳамкасблари қайси йўналишда ҳаракат қилиш ниятида эканини тезроқ билишдан манфаатдор.
Путин Арманистоннинг Европа Иттифоқига яқинлашиш истагини ғайритабиий ҳолат сифатида баҳоламаслигини билдирди.
Унинг қайд этишича, Пашинянни қўллаб-қувватловчи сиёсий кучлар анчадан буён Ғарб стандартларига ўтиш тарафдори бўлиб келмоқда.
Шу билан бирга, Путин референдум натижасидан қатъи назар, мамлакатлар нормал муносабатларни сақлаб қолишини билдириб, ҳар бир суверен давлат ўз ташқи сиёсий устуворликлари ва шерикларини мустақил танлаш ҳуқуқига эга эканини таъкидлади.
