Putin Rossiyada QQS 22 foizgacha oshirilishini vaqtinchalik chora deb atadi

Rossiya prezidenti Vladimir Putin milliy loyihalar bo‘yicha kengash yig‘ilishida birinchi marta rasman QQSni 22 foizga oshirish haqida fikr bildirdi. Uning aytishicha, hukumat qo‘ldagi barcha vositalarni muhokama qilar ekan, eng «rost, to‘g‘ri va ishonchli» varianti sifatida aynan ushbu soliqni oshirishga qaror qilingan. Putin bu chorani «umid qilamanki, vaqtinchalik » deb atadi va kelgusida stavkani yana pasaytirish ehtimoli borligini ta’kidladi.

Bu Putinning QQS oshirilishi bo‘yicha ilk batafsil izohi bo‘ldi. Ilgariroq, oktabr oyida «Valday» muloqot klubi yig‘ilishida u ushbu chora budjet xarajatlari va makroiqtisodiyotga oid masalalarni hal qilishda «eng yaxshi muvozonat topishga» yordam beradi, deb qayd etgan edi.

Soliq stavkasini oshirish haqida rasmiy xabar avval sentabr oyida berilgan. Moliya vazirligi bu o‘zgarishdan tushadigan qo‘shimcha daromad «mudofaa va xavfsizlik»ni moliyalashtirishga yo‘naltirilishini ochiq aytdi. Rossiya rasmiylari, shu jumladan Putinning o‘zi ham uzoq vaqt davomida soliq stavkalari 2030 yilgacha o‘zgarmasligiga va’da bergani e’tiborga olinsa, bu qaror jamiyat va biznesda jiddiy bahslarga sabab bo‘ldi.

Ekspertlarning ta’kidlashicha, QQSning oshirilishi Rossiya yalpi daromadining asosiy manbalariga bosimni kamaytirish va budjet defitsitini qisqartirish maqsadida qabul qilingan. Bunga Ukrainada davom etayotgan qimmat urush xarajatlari, neft narxlarining pasayishi va G‘arb sanksiyalari ortida davlat moliyasiga tushayotgan katta bosim sabab bo‘lmoqda.

Shu bilan birga, iqtisodchilar aholi uchun tovar va xizmatlar narxi yana oshib ketishi mumkinligini, bu esa inflatsiya bosimini kuchaytirish ehtimolini bildirishmoqda. Qaysidir ma’noda Putinning «umid qilamanki, vaqtinchalik» degan ifodasi soliq yukining qancha davom etishi noma’lumligini yana bir bor ko‘rsatib turibdi.