Қамалган президент ҳиқичоқ сабабли қамоқдан вақтинча чиқарилди

Бразилиянинг собиқ президенти Жаир Болсонару тиббий кўрсатмаларга биноан вақтинча қамоқдан озод этилди. Немис нашри Bild нашри хабарига кўра, сиёсатчи бир неча ойдан бери давом этаётган сурункали икота сабаб шифохонага ётқизилган.

Шифокорлар маълум қилишича, Болсонарунинг ҳолати диафрагмал нерв фаолияти билан боғлиқ бўлиб, уни бартараф этиш учун ультратовуш ёрдамида махсус муолажа ўтказилган. Жараён давомида нерв аниқланиб, оғриқсизлантирувчи препарат юборилган. Тиббий жамоа даволаш «муваффақиятли ўтгани»ни маълум қилди.

Бу ҳодисадан бир неча кун олдин Болсонару яна бир жарроҳлик амалиётини — чот соҳасидаги чуррани олиб ташлаш операциясини бошдан кечирган эди. Амалиёт Бразилия пойтахти Бразилияда жойлашган хусусий DF Star клиникасида ўтказилган. Сиёсатчининг рафиқаси операция асоратларсиз ўтганини таъкидлаган.

Собиқ президентнинг соғлиғи билан боғлиқ муаммолар сўнгги йилларда деярли узлуксиз давом этмоқда. 2018 йилдаги сайлов кампанияси вақтида унга қилинган пичоқли ҳужум оқибатида у оғир жароҳат олган ва қорин соҳасида жиддий шикастланишлар кузатилган. Шундан сўнг Болсонару бир неча бор операция қилинган ва узоқ даволаниш жараёнларидан ўтган.

Маълумотларга кўра, даволаш якунлангач, Болсонару яна қамоққа қайтарилиши режалаштирилган. У давлат тўнтаришига уринишда айбланиб, 27 йилдан ортиқ муддатга озодликдан маҳрум этилган. Ҳозирча унинг вақтинчалик озод қилиниши фақат тиббий сабаблар билан изоҳланмоқда ва суд ҳукми ўз кучида қолмоқда.