Qamchibek Tashiyevning ukasi korrupsiya ishi bo‘yicha qo‘lga olindi

Qirg‘iziston Milliy xavfsizlik davlat qo‘mitasi sobiq raisi Qamchibek Tashiyevning ukasi Shoirbek Tashiyev 1-aprel kuni huquqni muhofaza qiluvchi organlar tomonidan qo‘lga olindi. Bu haqda mamlakat Ichki ishlar vazirligi rasman ma’lum qildi.

Tergov materiallari

Tergov ma’lumotlariga ko‘ra, u «Qirg‘izneftgaz» ochiq aksiyadorlik jamiyatidagi yirik miqdordagi talon-toroj va korrupsiya holatlari bo‘yicha gumon qilinmoqda. Ushbu ish Davlat soliq qo‘mitasi materiallari hamda auditorlik tekshiruvlari asosida qo‘zg‘atilgan.

Rasmiy bayonotda aytilishicha, jinoyat ishi doirasida olib borilayotgan surishtiruv jarayonida Shoirbek Tashiyevning faoliyatida qonunbuzarlik alomatlari aniqlangan. Shu asosda u tezkor tartibda qo‘lga olingan va tergov harakatlari davom etmoqda.

Depututlik vakolati bekor qilinishi

Qayd etilishicha, u ilgari Qirg‘iziston Jo‘qorg‘i Keneshi deputati sifatida faoliyat yuritgan. Biroq unga nisbatan shubhalar paydo bo‘lganidan so‘ng deputatlik vakolatlari bekor qilingan va tegishli guvohnomasi haqiqiy emas deb topilgan.

Hozirda qo‘lga olingan shaxs Bishkek shahridagi vaqtincha saqlash hibsxonasiga joylashtirilgan. Tergov organlari mazkur ish bo‘yicha boshqa ishtirokchilar va ehtimoliy qonunbuzilish holatlarini ham o‘rganmoqda.

MXDQdagi «tozalash» va yangi tayinlovlar

Qamchibek Tashiyev 10-fevral kuni vazifasidan ozod etildi. Shuningdek, uning uch nafar o‘rinbosari — Kurvanbek Avazov, Daniel Risaliyev va Elizar Smanov ham ishdan olindi. Maxsus xizmat raisi vazifasini vaqtincha bajaruvchi etib Jumgalbek Shabdanbekov tayinlandi.

Prezident Sadir Japarov voqealar fonida bergan intervyusida Tashiyev tayinlagan vazirlar va uning yaqinlarini ishdan bo‘shatish boshlagani, ba’zilari esa o‘z xohishiga ko‘ra ketayotgani haqidagi savolga quyidagicha javob berdi.

«Hammaga xotirjam ishlashni aytdim. O‘z xohishi bilan ketayotganlar — marhamat. Barcha vazirliklarni o‘g‘rilik fakti bo‘yicha tekshiryapmiz, topilsa, jazoga tortiladi. Men har doim vazirlarni qarindoshlar va do‘stlarni ishga olmang, deb ogohlantirganman. Yaqinlarimdan hech biri yuqori davlat lavozimini egallamagan», – dedi u.

Japarov davlat boshqaruvi kuch bilan emas, aql bilan amalga oshirilishi lozimligini ta’kidladi. Uning fikricha, mamlakatda davlat tuzilmalari faoliyati shaxsan nazorat qilinadi va yuzaga kelayotgan muammolarga tezkor chora ko‘rilmoqda. Prezident barcha islohotlar qonun doirasida amalga oshirilishini qo‘shimcha qildi. Uning aytishicha, vaziyatni beqarorlashtirishga urinishlar asossiz bo‘lib, mamlakatda barqarorlik saqlanmoqda.