Қирғизистонда телевидение ва радио соҳасида лицензия бериш тартиби янгиланди
Қирғизистон президенти Садир Жапаров телевидение ва радиоэшиттириш соҳасини тартибга солувчи янги қонунни имзолади. Ҳужжат лицензиялаш, жавобгарлик ва низоларни кўриб чиқиш тартибини мамлакатнинг янги Рақамли кодексига мослаштиришни назарда тутади.
Қирғизистонда телевидение ва радио соҳаси фаолиятини тартибга солувчи қонунчиликка муҳим ўзгартишлар киритилди. Президент Садир Жапаров «Телевидение ва радиоэшиттириш тўғрисида»ги қонунга тузатишлар киритиш ҳақидаги ҳужжатни имзолади. Мазкур қонун 2026 йил 23 апрел куни Жогорку Кенеш томонидан қабул қилинган эди.
Амалдаги қонун Рақамли кодекси талабларига мувофиқлаштирилади
Янги ўзгартишлар амалдаги қонунни Қирғизистоннинг янги Рақамли кодекси талабларига мувофиқлаштириш мақсадида ишлаб чиқилган. Шу орқали телевидение ва радио соҳасида лицензия бериш тартиби эндиликда Рақамли кодекс ҳамда лицензиялашга оид қонунчилик асосида амалга оширилади.
Қонуннинг янги таҳририда телевидение ва радио соҳасидаги қонунбузарликлар учун жавобгарлик масаласи ҳам қайта белгилаб берилган. Энди бундай ҳуқуқбузарликлар бўйича чоралар фуқаролик қонунчилиги ва ҳуқуқбузарликлар тўғрисидаги кодекс асосида қўлланади.
Шунингдек, телевидение ва радио соҳаси билан боғлиқ низоларни кўриб чиқиш тартибига ҳам аниқлик киритилди. Бундай ишлар ҳуқуқбузарликлар тўғрисидаги кодекс ва маъмурий тартиб-таомиллар ҳақидаги қонун доирасида кўриб чиқилади.
Ҳужжат Қирғизистон Рақамли кодекси кучга кириши билан бир вақтда амал қила бошлайди. Расмийлар ушбу ўзгартишлар рақамли медиа соҳасини бошқариш тизимини янада тартибли ва шаффоф қилишга хизмат қилишини таъкидламоқда.
