Qishloq xo‘jaligi yerlari endi qarz uchun garov sifatida qo‘yilishi mumkin

30 sentyabr kuni Vazirlar Mahkamasi qarori bilan qishloq xo‘jaligi yerlaridan foydalanish huquqini garov sifatida qo‘yish tartibi tasdiqlandi. Hujjat Lex.uz portalida e’lon qilindi. Endi yer uchastkasini ijaraga olgan shaxslar belgilangan shartlar asosida uni kredit olish uchun garovga qo‘yishlari mumkin. Qarorga ko‘ra, ijarachi yer uchastkasini garovga qo‘yish uchun yer sohibi roziligisiz ham harakat qila oladi, agar bu holat qonun yoki ijara shartnomasida belgilangan bo‘lsa. Yer sohibi sifatida tuman va shahar hokimliklari yoki boshqa vakolatli davlat organlari ishtirok etadi. Amaldagi huquqiy asossiz, subijarada bo‘lgan yoki muddati tugagan yer uchastkalari garovga qo‘yilishi qat’iyan taqiqlanadi. Garov uchun yer huquqlari aniq belgilangan va rasmiy ro‘yxatdan o‘tgan bo‘lishi shart. Ijarachi garovga qo‘yiladigan yer uchun hujjat tayyorlash maqsadida «O‘zdaverloyiha» institutining hududiy bo‘limlariga murojaat qiladi. Institut yer uchastkasi rejasini tayyorlab, uning garov sifatida ajratilishini tasdiqlaydi. Shu asosda baholovchi tomonidan yer huquqining qiymati aniqlanadi va natijalar bankka taqdim etiladi. Bank kredit ajratishda yer huquqi qiymati va ijara muddatini hisobga oladi. Qarz to‘lov muddati yer ijara muddati tugashidan kamida 5 yil avval yakunlanishi shart. Garov shartnomasi davlat kadastri palatasi filialida ro‘yxatdan o‘tadi. Agar qarzdor majburiyatni bajarmasa, bank garov huquqini sotuvga qo‘yish yoki boshqa qonuniy yo‘l bilan undirib olish huquqiga ega bo‘ladi. Shu yilning sentyabr oyida prezident Shavkat Mirziyoyev yerdan samarali foydalanishni ta’minlash haqidagi farmonni imzolagandi. Unga ko‘ra, mamlakatdagi barcha qishloq xo‘jaligi yerlari ijara huquqiga o‘tkaziladi. O‘zbekiston fuqarolari va ular tashkil etgan kompaniyalar yerni 30 yilgacha, xorijiy ishtirokdagi korxonalar esa 25 yilgacha muddatga ijaraga olishi mumkin.