Ramzan Qodirov va Z blogerlar yangi 500 rubllik kupyura dizayni uchun kurashmoqda

Rossiya Banki oktyabr oyida Shimoliy Kavkaz federal okrugiga bag‘ishlangan yangi 500 rubllik kupyuraning dizaynini tanlash uchun ovoz berishni boshladi. Loyihaga ko‘ra, kupyuraning old qismida Pyatigorsk shahridagi madaniy yodgorliklar, orqa qismida esa SHKFO shaharlarining mashhur joylari aks ettiriladi. Hozircha yetakchi nomzodlar ikkita: «Grozniy-Siti» majmuasi va Elbrus tog‘i. Ular orasidagi farq bir necha marta o‘zgarib turgan, lekin avval Elbrus peshqadam bo‘lgan. Uchinchi o‘rinni Darbant qal’asi egallab turibdi. Checheniston rahbari Ramzan Qodirov 4 oktyabr kuni o‘z Telegram kanalida «Grozniy-Siti»ni qo‘llab-quvvatlashga chaqirdi, bu majmua «Chechenistonning Rossiya tarkibida qayta tiklanish ramzi» ekanini ta’kidladi. Shu xabardan keyin chechen majmuasi uchun ovozlar keskin ko‘paygan, deb yozadi «Vot Tak» nashri. Bunga javoban Z-blogerlar «Elbrus»ni himoya qilish uchun onlayn harakat boshladi. Ular orasida radikal fikrlari bilan tanilgan Vladislav Pozdnyakov va harbiy blogerlar — «Dva mayora», «Zapiski Vyeterana» va «Ribar» kabi yirik kanallar bor. Ular Qodirovni administrativ resurslar va soxta ovozlardan foydalanishda aybladilar. Qodirov esa targ‘ibotni yanada kuchaytirib, 10 ta iPhone 17 telefonlari o‘yinini e’lon qildi. Ishtirokchilardan «Grozniy-Siti» uchun ovoz berish va skrinshotni ijtimoiy tarmoqlarda joylash talab etiladi. Shunday yo‘l bilan uning targ‘ibotiga hukumat a’zolari va mashhur chechen sportchilar ham qo‘shildi. Shu bilan birga, Rossiya Banki raqobatni ijobiy baholadi, xalqning faolligi «mamlakat madaniy xilma-xilligini ifodalovchi ramzlarni tanlashda muhim» ekanini ta’kidladi. Elvira Nabiullina jamoatchilik qiziqishini qo‘llab-quvvatlashini bildirdi. Ovoz berish 14 oktyabrga qadar davom etadi. Yangi kupyura esa 2026 yilning ikkinchi yarmida taqdim etilishi rejalashtirilgan. Hozircha tortishuv nafaqat onlayn muhitda, balki siyosiy va etnik maydonda ham qizib bormoqda.