Rossiya 40 dollarlik neft narxlariga tayyorlanmoqda: bozorda yangi shok xavfi

Ukraina tashqi razvedkasi ma’lumotiga ko‘ra, 2025 yilning oxiri yoki 2026 yil boshida dunyoda neft narxlari barreliga 40–50 dollargacha tushishi mumkin. Hozirgi paytda kotirovkalar 66–68 dollar atrofida bo‘lib, bozorda yangi narx urushi kuzatilmoqda. Narx pasayishining asosiy sababi — OPEC+ doirasidagi kelishuvlarning buzilishi. Saudiya Arabistoni qazib olish hajmini keskin oshirib, bozorda ortiqcha taklif yaratmoqda. Shu bilan birga, slanetsli neft eksport qiluvchi mamlakatlar ham past narxlarga qaramay qazib olishni kuchaytirayapti. Xitoy iqtisodiyotining sekinlashishi — neft bozori uchun qo‘shimcha xavf omillaridan biri. Bu davlat dunyodagi eng yirik iste’molchilardan biri hisoblanadi. Shuningdek, Braziliya, Gayana va Norvegiyadan xom ashyo eksportining oshishi ham taklif ortiqchasini kuchaytirayapti. Tahlilchilarning ta’kidlashicha, so‘nggi yillardan farqli ravishda, geosiyosiy xavf-xatarlar neft narxlariga deyarli ta’sir qilmayapti. Bu esa bozorda talab va taklifning yangi muvozanati shakllanayotganini ko‘rsatadi. Agar bu tendensiya davom etsa, Rossiya moliya organlari neft narxlarining «shok» tarzda 40–50 dollarga tushishini kutmoqda. Bu nafaqat Rossiya, balki barcha yirik eksportchi davlatlar byudjetlariga jiddiy zarba berishi mumkin.