Rossiya armiyasi Sumini tahdid ostiga oldi — Ukraina xavotirda

Rossiya Mudofaa vazirligi so‘nggi kunlarda bir necha qishloqlarni egallaganini, shanba kuni esa Andreyevkani nazoratga olganini e’lon qildi. Ukraina tomoni bu ma’lumotni hozircha rasman tasdiqlamagan bo‘lsa-da, mustaqil DeepState tahlil blogi bu hudud Rossiya qo‘liga o‘tganini tasdiqlagan. Sumi shahri — Ukraina shimolidagi yirik ma’muriy markaz bo‘lib, hozirda Rossiyaning frontdagi dronlari yetadigan masofaga yaqinlashgan. Ukraina harbiylariga ko‘ra, Rossiya qo‘shinlari front bo‘ylab taxminan 15 km oldinga siljib, ayrim joylarda 6–7 km chuqurlikka kirib borgan. Agar Rossiya qo‘shinlari Yunakivkani egallasa, Sumi shahri bevosita hujum tahdidi ostida qoladi. Sumi viloyati harbiy ma’muriyati rahbari Oleg Grigorevga ko‘ra, hozirgi vaziyat murakkab va tez o‘zgaruvchan. Uning ta’kidlashicha, Rossiya tomonidan chegaradagi qishloqlar doimiy ravishda o‘qqa tutilmoqda. O‘tgan dam olish kunlarida viloyat hokimiyati xavfli vaziyat tufayli yana 11 ta qishloq aholisini majburiy evakuatsiya qildi. So‘nggi kunlarda Ukraina ham bir qator javob hujumlari amalga oshirdi — Rossiyaning strategik bombardimonchi samolyotlari va Qrim ko‘prigi zarbaga uchradi. Ammo Rossiya Sumida bosimni oshirmoqda va Donbassda to‘liq nazorat o‘rnatishni maqsad qilgan. Turkiyada o‘tkazilgan so‘nggi muzokaralarda Moskva urushni to‘xtatish uchun Kiyevdan yangi hududlardan voz kechish va armiya salohiyatini cheklashni talab qilgan. Kiyev bu shartlarga rozi bo‘lishi ehtimoldan yiroq.