Rossiya Boltiqbo‘yi davlatlariga qarshi urush ochadimi? Uch davlat “paytavasiga qurt tushdi”.

Litva, Latviya va Estoniya hukumati Rossiya bosqinchisi bo‘lgan taqdirda, tinch aholini ommaviy evakuatsiya qilishni o‘z ichiga olgan favqulodda vaziyatlar rejasini ishlab chiqmoqda. Bu haqda Reuters xabar berdi. To‘liq miqyosli Rossiya-Ukraina urushi boshlanishi bilan Boltiqbo‘yi davlatlari mudofaa xarajatlarini ikki baravar oshirgandi. Ularning hukumatlari Rossiya va Belarus bilan chegaralarda mudofaa inshootlarini qurish rejalarini bir necha bor e’lon qilgan. 2025 yil may oyida Litva, Latviya va Estoniya ham fuqarolik mudofaasi sohasida hamkorlik qilishga kelishib oldilar. Shu haftada Litva poytaxtida aholini evakuatsiya qilish bo‘yicha mashg‘ulotlar o‘tkazildi. Mashg‘ulotlar rejasiga ko‘ra, Vilnyusning to‘rt tumanidan 100 ga yaqin odam shahar transporti yordamida mamlakatning boshqa shaharlari: Kelme, Kedainiai, Kaunas, Shiaulyay va Ukmergedagi tayyorlangan qabul markazlariga evakuatsiya qilindi. Reuters agentligi bilan suhbatlashgan Litva rasmiylarining aytishicha, ko‘proq fuqarolar uchun favqulodda vaziyatlar rejasi ishlab chiqilmoqda. Litva yong‘in va qutqaruv boshqarmasi boshlig‘i Renatas Pojelaning so‘zlariga ko‘ra, Rossiya hujumi sodir bo‘lgan taqdirda, Litva Rossiya va Belarus chegaralaridan 40 kilometr masofada aholining yarmini — taxminan 400 ming kishini evakuatsiya qilishni rejalashtirmoqda. G‘arbiy shahar Kaunasda 300 ming kishi mahalliy maktablar, universitetlar, cherkovlar va sport maydonchasiga joylashtirilishi kutilmoqda. Pojelaning so‘zlariga ko‘ra, evakuatsiya rejasi doirasida yig‘ish punktlari allaqachon tanlangan, jumladan, Vilnyusda poyezdlar va avtobuslar ajratilgan, omborlar zaruriy anjomlar bilan ta’minlangan. Haydovchilar uchun evakuatsiya qilish uchun afzal qilingan ikkinchi darajali yo‘llar (asosiy magistrallar armiya uchun tozalanadi) va boshpana topish mumkin bo‘lgan shaharlar ko‘rsatilgan xarita tayyorlandi. "Estoniya o‘z aholisining o‘ndan bir qismini — taxminan 140 ming kishini vaqtinchalik boshpanalarga ko‘chirish rejasini tayyorlamoqda", - dedi Estoniya Qutqaruv kengashi maslahatchisi Ivar May. Ular orasida Rossiya bilan chegaradosh Narva shahri (50 ming kishi istiqomat qiladi, asosan ruslar) aholisi ham bor. Mayning aytishicha, bu reja faqat boshqa boradigan joyi bo‘lmaganlar uchun amal qiladi. "Qolganlari qarindoshlarinikiga ko‘chib o‘tishlari mumkin", - deydi rasmiylar. Latviya rasmiylarining hisob-kitoblariga ko‘ra, mamlakat aholisining uchdan bir qismi — 630 ming kishi Rossiya bosqiniga uchragan taqdirda o‘z uylarini tashlab ketishadi, dedi agentlikka mamlakat Davlat yong‘in va qutqaruv xizmati rahbari o‘rinbosari Ivars Nakurts. Shunday qilib, jami milliondan ortiq odam boshqa joyga ko‘chirilishi mumkin. Boltiqbo‘yi davlatlarining umumiy aholisi 6,2 million kishi (Litva – 2,9 million, Latviya – 1,9 million, Estoniya – 1,4 million). Shu bilan birga, uchta Boltiqbo‘yi mamlakatining hech birida fuqarolarni o‘z hududlaridan tashqariga ko‘chirish bo‘yicha batafsil rejalar mavjud emas. Shu bilan birga, Rossiya an’anaviy ravishda Yevropaga hujum qilish rejalarini rad etadi. Rossiya prezidenti Vladimir Putin Slovakiya Bosh vaziri Robert Fiko bilan uchrashuvda Yevropaning Rossiyaning ularga hujum qilish rejalari haqidagi da’volari “provokatsiya yoki to‘liq qobiliyatsizlik” ekanini aytdi.