Rossiya bug‘doy eksporti uchun bojni keskin oshirdi

Rossiya qishloq xo‘jaligi vazirligi 24 sentyabrdan boshlab bug‘doy eksporti uchun yangi boj stavkalarini joriy etganini ma’lum qildi. Yangi tartibga ko‘ra, boj narxi 495,9 rubldan 655,6 rublgacha ko‘tarildi. Bu qariyb bir yarim barobar oshishni anglatadi. Yangi tariflar faqat bug‘doyga emas, balki makkajo‘xoriga ham taalluqli bo‘ldi. Unga nisbatan boj 1,9 barobarga ko‘tarilib, 398,2 rubldan 743,1 rublga yetdi. Shu bilan birga, arpa eksporti uchun stavka nol darajada qoldirildi. Barcha belgilangan tariflar 30 sentyabrgacha amal qiladi. Qaror indikativ narxlar asosida hisoblangan: bug‘doy uchun — tonnasiga 226 dollar, arpa uchun —207,9 dollar va makkajo‘xori uchun —226 dollar. Hisobotga ko‘ra, narxlarda katta o‘zgarish kuzatilmagan bo‘lsa-da, Rossiya hukumati g‘alla bozorini tartibga solish uchun bojlarni oshirishga qaror qildi. Rossiyada «don dempferi» deb ataluvchi suzuvchi boj tizimi 2021 yildan beri amal qiladi. Unga ko‘ra, bug‘doy, makkajo‘xori va arpa uchun stavka har hafta qayta ko‘rib chiqiladi, yig‘ilgan mablag‘ esa qishloq xo‘jaligi ishlab chiqaruvchilariga subsidiya sifatida yo‘naltiriladi. 2022 yildan boshlab hisob-kitoblar rublda amalga oshirilmoqda. Hozirda bug‘doy uchun bazaviy narx tonnasiga 18 ming rubl, arpa va kukuruza uchun esa 17,875 ming rubl etib belgilangan. Bu esa Rossiyaning g‘alla eksportidagi tartibga solish choralari uzoq muddatli strategiyaning bir qismi ekanini ko‘rsatadi.