Rossiya Markaziy banki raisi yo‘qolib qoldimi?
Rossiya Markaziy banki rahbari Elvira Nabiullina Peterburg xalqaro iqtisodiy forumida qatnashmagandi, Putinning yig‘ilishida ham ko‘rinish bermadi. OAV uning iste’fosi yaqinligiga e’tibor qaratmoqda, Kreml fitna nazariyasiga berilmaslikka chaqirmoqda.
Rossiya Markaziy banki raisi Elvira Nabiullina so‘nggi bir haftadan ziyod vaqt ichida bir qator muhim tadbirlarda ishtirok etmagani mamlakat siyosiy va iqtisodiy doiralarida turli taxminlarni keltirib chiqardi. U 4-iyun kuni Sankt-Peterburg xalqaro iqtisodiy forumida, 9-iyun kuni NAUFOR konferensiyasida hamda 10-iyun kuni prezident Vladimir Putin ishtirokida o‘tkazilgan inflatsiya va asosiy stavka masalalariga bag‘ishlangan yig‘ilishda qatnashmadi.
Nabiullinaning tadbirlarda ishtirok etmasligi sababi
Rossiya Markaziy banki matbuot xizmati Nabiullinaning tadbirlarda ishtirok etmasligiga kasalligi sabab bo‘lganini ma’lum qildi. Kreml matbuot kotibi Dmitriy Peskov ham uning hali to‘liq sog‘aymaganini bildirib, bu holat atrofida fitna nazariyalari yaratmaslikka chaqirdi. Shu bilan birga, Nabiullinaning qanday kasallikka chalingani va qachon ishga qaytishi haqida rasmiy ma’lumot berilmagan.
Ommaviy axborot vositalari va ekspertlar Nabiullinaning yo‘qligiga turlicha izoh bermoqda. Avvalroq uning Peterburg iqtisodiy forumida ishtirokchilar ro‘yxatidan chiqib ketgani ma’lum bo‘lgan, bu esa turli taxminlarga sabab bo‘lgan. Keyinchalik ma’lum bo‘lishicha, u maslahatchisi Aleksey Mojinning vidolashuv marosimida ham qatnashmagan.
Muhokamalarning yana bir sababi Nabiullinaning vakolat muddati bilan bog‘liq. U hozir Markaziy bank rahbari sifatida uchinchi muddatini o‘tamoqda va amaldagi qonunchilikka ko‘ra, bu uning oxirgi muddati hisoblanadi. Vakolatlari 2027 yil iyun oyida tugaydi. The Bell nashri ma’lumotiga ko‘ra, uning ehtimoliy vorislari sifatida Maksim Oreshkin, Pyotr Fradkov va Andrey Kostin nomlari tilga olinmoqda.
Ekspertlar ta’kidlashicha, Rossiya Markaziy banki mamlakatning pul-kredit siyosati va moliya tizimi barqarorligida hal qiluvchi o‘rin tutadi. Nabiullina esa so‘nggi yillarda iqtisodiy qarorlar qabul qilishdagi ta’sirchan figura sifatida shakllangan. Shu sababli uning ehtimoliy ketishi yoki vakolatlarining uzaytirilishi Rossiya iqtisodiyoti uchun muhim siyosiy va moliyaviy oqibatlarga olib kelishi mumkin.
