Rossiya Yevropaning 11 ta davlati bilan harbiy shartnomalarni bekor qilyapti

Rossiya Federatsiyasi hukumati 1992–2002 yillar oralig‘ida Yevropa davlatlari bilan tuzilgan harbiy hamkorlikka oid bitimlarni bekor qilish bo‘yicha qaror qabul qildi. Unga ko‘ra, Rossiya Mudofaa vazirligiga Yevropa Ittifoqiga a’zo bir qator davlatlar hamda Buyuk Britaniya bilan imzolangan harbiy kelishuvlarni bekor qilish vakolati berildi.

Qaror 19-dekabr kuni Rossiyaning rasmiy huquqiy axborot portalida e’lon qilingan. Hujjatga muvofiq, Rossiya tomonidan Yevropa davlatlari bilan tuzilgan 10 ta ikki tomonlama harbiy hamkorlik shartnomasi hamda Rossiya va Buyuk Britaniya mudofaa idoralari o‘rtasidagi bitta memorandum o‘z kuchini yo‘qotishi mumkin.

Bekor qilinishi rejalashtirilgan shartnomalar orasida Germaniya, Polsha, Ruminiya, Daniya, Norvegiya, Niderlandiya, Xorvatiya, Belgiya va Chexiya bilan «harbiy sohada hamkorlik to‘g‘risida»gi kelishuvlar mavjud. Shuningdek, Rossiya va Buyuk Britaniya mudofaa vazirliklari o‘rtasida tuzilgan tegishli memorandum ham ushbu ro‘yxatdan o‘rin olgan.

Mazkur bitimlar Sovet Ittifoqi parchalanganidan so‘ng shakllangan harbiy-siyosiy munosabatlar doirasida imzolangan bo‘lib, tomonlar o‘rtasidagi ikki tomonlama harbiy hamkorlikning huquqiy asosini belgilab bergan edi. Ular asosan tajriba almashish, harbiy delegatsiyalar tashrifi, qo‘shma mashg‘ulotlar va muloqot mexanizmlarini qamrab olgan.

Tahlilchilarga ko‘ra, ushbu qaror Rossiya va Yevropa davlatlari o‘rtasidagi munosabatlar keskinlashuvi hamda so‘nggi yillarda yuzaga kelgan geosiyosiy ziddiyatlar fonida qabul qilinmoqda. Bitimlarning bekor qilinishi rasmiy harbiy aloqalarni yanada qisqartirishi va tomonlar o‘rtasidagi hamkorlik formatlarini de-fakto to‘xtatishi mumkin.

Hozircha Rossiya tomoni ushbu qarorning amaliy oqibatlari va kelgusidagi harbiy hamkorlik formatlari yuzasidan qo‘shimcha izoh bermagan.