Rossiyada migrantlarni ishdan bo‘shatish uchun asoslar ro‘yxati kengaytiriladi
OAVga ko‘ra, 1-martdan hududiy taqiqlar asosida migrantlarni ishdan bo‘shatish qonuniy kuchga ega bo‘ladi.
Rossiyada chet el fuqarolari bilan mehnat shartnomalarini bekor qilish uchun asoslar kengaytiriladi. Mehnat qonunchiligiga kiritilgan o‘zgartirishlar 2026 yil 1-martdan kuchga kiradi, deya yozmoqda 24.kg.
Yangi qonunga ko‘ra, ish beruvchilar migrantlarni nafaqat federal darajada cheklovlar joriy etilganda, balki mintaqaviy hokimiyat organlari tomonidan tegishli qarorlar qabul qilingan taqdirda ham qonuniy ravishda ishdan bo‘shatishlari mumkin bo‘ladi. Gap alohida faoliyat sohalariga chet el ishchi kuchini jalb qilish taqiqi haqida bormoqda.
Ilgari bunday cheklovlar, masalan, Moskva oblasti, Krasnodar o‘lkasi, Novgorod va Nijniy Novgorod oblastlarida joriy etilgan edi. U yerda mintaqaviy normativ hujjatlar patent asosida ishlovchi chet el fuqarolarini qator sohalarda ishga joylashtirishni taqiqlagan.
Migratsiya siyosatini qattiqlashtirish
Shu vaqtgacha Rossiya Mehnat kodeksida mintaqaviy taqiqlar tufayli ishchini bo‘shatish mexanizmi aniq ko‘rsatilmagan edi. Mahalliy hokimiyat biror sohada (masalan, taksi yoki umumiy ovqatlanish) migrantlarga ishlashni taqiqlasa, ish beruvchi uni bo‘shatishga qonuniy asos topolmagan. Yangi qonun ish beruvchilarga shunday asos beradi.
Hozirda Rossiyaning 30 dan ortiq mintaqasida migrantlarning muayyan sohalarda ishlashiga cheklovlar o‘rnatilgan. Eng ko‘p taqiqlar transport (taksi va avtobuslar), chakana savdo, ta’lim va tibbiyot sohalariga tegishli.
Cheklovlar asosan patent asosida ishlovchi (Vizasiz davlatlar, jumladan O‘zbekiston, Tojikiston fuqarolari) migrantlarga tegishli. Yevroosiyo iqtisodiy ittifoqi (YeAES) a’zolari (Qirg‘iziston, Qozog‘iston, Armaniston, Belarus) uchun odatda istisnolar mavjud.
