Samarqand viloyatini rivojlantirish uchun Prezident qarori qabul qilindi
Yangi qaror viloyatda yo‘l, energiya, suv va ta’lim sohalarida aniq investitsiya mexanizmlarini ishga tushiradi.
2025 yil 27-dekabr kuni «Samarqand viloyatini ijtimoiy-iqtisodiy rivojlantirishga qaratilgan chora-tadbirlarni yanada jadallashtirish to‘g‘risida»gi Prezident qarori qabul qilinib, hududda iqtisodiy o‘sishni tezlashtirishga qaratilgan manzilli dastur tasdiqlandi. Hujjat infratuzilma, kommunal xo‘jalik, qishloq xo‘jaligi va ta’lim sohalarida aniq vazifalarni belgilaydi.
Qarorga muvofiq, Samarqand viloyatida drayver loyihalarni amalga oshirish uchun transport infratuzilmasini yaxshilashga ustuvor ahamiyat berilmoqda. Xususan, xalqaro, davlat va mahalliy ahamiyatga ega hamda ichki xo‘jaliklararo jami 298 kilometr avtomobil yo‘llarini qurish, rekonstruksiya qilish va ta’mirlash, shuningdek 15 ta yo‘l o‘tkazgichni barpo etish rejalashtirilgan.
Elektr ta’minoti tizimini modernizatsiya qilish doirasida 14 ta tuman va shaharda podstansiya ta’mirlanadi, 70 ta yangi transformator punkti o‘rnatiladi hamda 137 kilometr elektr tarmoqlari yangilanadi. Bu choralar sanoat va aholi iste’moli uchun barqaror energiya ta’minotini ta’minlashga qaratilgan.
Ichimlik suvi va oqova suv tizimini yaxshilash maqsadida 14 ta tumanda 90 ta suv inshooti hamda 242 kilometr suv tarmoqlarini qurish va ta’mirlash ishlari amalga oshiriladi. Shu orqali aholi uchun kommunal xizmatlar sifatini oshirish ko‘zda tutilgan.
Qarorga asosan, 2026 yil 1-iyuldan yangi moliyaviy mexanizmlar joriy etiladi. Qishloq xo‘jaligi korxonalari to‘laydigan suv resurslaridan foydalanganlik uchun soliq tushumlari to‘liq tuman va shahar suv korxonalari ixtiyoriga o‘tkaziladi. Paxta maydonlarida tomchilatib sug‘orish tizimini joriy etgan xo‘jaliklarga har gektari uchun 12 million so‘m subsidiya ajratiladi.
Shuningdek, 2026 yil 1-yanvardan barcha qurilish va modernizatsiya loyihalari «yashil» tamoyillar va energiya samaradorligi bo‘yicha minimal talablar asosida amalga oshiriladi. Ta’lim sohasida esa 2026–2027 o‘quv yilidan Kattaqo‘rg‘on davlat pedagogika institutida Turin politexnika universiteti bilan hamkorlikda muhandislik yo‘nalishlari bo‘yicha yangi fakultet ochish rejalashtirilgan.
