Шаҳар кўчаларидаги ноқонуний пойгалар учун жавобгарлик жорий этилиши мумкин
Адлия вазирлиги шаҳар кўчаларида ноқонуний пойгаларни ташкил этиш ва унда иштирок учун маъмурий ва жиноий жавобгарлик чораларини назарда тутувчи қонун лойиҳаси ишлаб чиқилганини маълум қилди.
Адлия вазирлиги ноқонуний пойгаларни ташкил этганлик ва уларда иштирок этганлик учун маъмурий ҳамда жиноий жавобгарлик жорий этишни назарда тутувчи қонун лойиҳасини ишлаб чиқди. Ҳужжат 17 феврал куни манфаатдор вазирлик ва идораларга келишиш учун юборилган.
Вазирлик маълумотига кўра, йўлларда ноқонуний равишда уюштирилаётган пойгалар йўл ҳаракати иштирокчилари хавфсизлигига жиддий таҳдид солмоқда. Бундай ҳолатлар аҳоли осойишталигига таъсир кўрсатиб, айрим ҳолларда инсон ўлимигача олиб келаётгани таъкидланди.
Расмий изоҳда қайд этилишича, бу каби ҳолатлар жамоатчиликнинг ҳақли эътирозлари ва хавотирларини кучайтирмоқда. Шу боис, йўл-транспорт ҳодисаларининг олдини олиш ва хавфсизликни таъминлаш мақсадида қонунчиликни кучайтириш зарурати юзага келган.
Шуни инобатга олиб, Адлия вазирлиги йўлларда ноқонуний пойгаларни ташкил этиш оқибатида вужудга келаётган йўл-транспорт ҳодисаларини олдини олиш мақсадида маъмурий ва жиноий жавобгарликни жорий этишни назарда тутувчи қонун лойиҳасини ишлаб чиқиб, манфаатдор вазирлик ва идораларга келишиш учун киритган. Ҳозирча жавобгарликнинг қандай бўлиши ҳақида маълумот берилмаган.
Ҳужжат белгиланган тартибда келишилгандан сўнг жамоатчилик муҳокамасига қўйилади. Шундан кейингина уни парламентга киритиш масаласи кўриб чиқилиши кутилмоқда.
