Shavkat Mirziyoyev Birlashgan kurash dunyosi rahbarini mukofotladi

Bugun, 13 oktyabr kuni O‘zbekiston Respublikasi Prezidenti Shavkat Mirziyoyev mamlakatda bo‘lib turgan Birlashgan kurash dunyosi rahbari Nenad Lalovichni qabul qilib, uni «Do‘stlik» ordeni bilan mukofotladi. Bu haqda davlat rahbari matbuot xizmati xabar berdi. Qayd etilishicha, ushbu nufuzli global tuzilma bilan O‘zbekistonda sportning yakkakurash turlarini tashkiliy-ekspert jihatdan qo‘llab-quvvatlash va yanada ommalashtirish sohasida amaliy hamkorlikni kengaytirish masalalari ko‘rib chiqilgan. «Mamlakatimizda an’anaviy tarzda yunon-rum kurashi, erkin kurash, ayollar kurashi, shuningdek, aralash jang san’atlari faol rivojlanmoqda», deyiladi xabarda. Keyingi yillarda o‘zbekistonlik yakkakurashchilar nufuzli musobaqalarda 45 ta yuksak sovrinni, jumladan, Olimpiya o‘yinlari va jahon chempionatida oltin medallarni qo‘lga kiritgan. Muzokaralar chog‘ida xalqaro birlashma rahbari Yangi O‘zbekistonda ommaviy sport sohasida amalga oshirilayotgan keng ko‘lamli islohotlarni, jumladan, hammabop va zamonaviy infratuzilmani kengaytirish, nufuzli turnir va musobaqalarni muntazam o‘tkazish orqali yoshlarni sport harakatiga keng jalb etish borasidagi ishlarni yuqori baholagan. «Mamlakatimizda yirik qit’a va jahon chempionatlarini tashkil etish, tashkilot shafeligida Mintaqaviy kurash akademiyasini ta’sis etish, sport tibbiyoti, diyetologiyasi, psixologiyasi va boshqa ustuvor yo‘nalishlarda sheriklik masalalari muhokama qilindi», - deyiladi xabarda. Prezident bolalar va yoshlar o‘rtasida sport yakkakurashlarini ommalashtirish, iqtidorlarni saralash va tayyorlashning zamonaviy usullarini joriy etish, mahallalardagi to‘garak va zallardan tortib sport mahorati maktablari va ixtisoslashgan majmualargacha bo‘lgan infratuzilmani takomillashtirish muhimligini ta’kidlagan. Bu chora-tadbirlar, davlat rahbari ta’kidlaganidek, Olimpiya o‘yinlari va boshqa yirik musobaqalarda yangi muvaffaqiyatlarga olib kelishi kerak. Uchrashuv yakunida O‘zbekiston prezidenti ommaviy sport va yakkakurash turlarini rivojlantirish hamda qo‘llab-quvvatlashga qo‘shgan katta shaxsiy hissasi uchun Nenad Lalovichga O‘zbekistonning yuksak mukofoti – «Do‘stlik» ordenini topshirgan.