Смартфон нархлари яна икки йил давомида қимматлаши кутилмоқда — «Xiaomi» раҳбари

«Xiaomi» бош директори Лей Сзюн смартфонлар нархи яқин икки йил ичида ҳам ўсишда давом этиши мумкинлигини маълум қилди.

Унинг таъкидлашича, бу жараён вақтинчалик ҳолат эмас ва электрон қурилмалар ишлаб чиқариш занжирида кузатилаётган узоқ муддатли тенденция ҳисобланади.

Компания раҳбари сўзларига кўра, айрим асосий компонентлар нархининг ўсиши ҳозирнинг ўзида қурилмалар ишлаб чиқариш харажатларига босим ўтказмоқда.

Хотира бозори босими

Лей Сзюннинг айтишича, асосий муаммо оператив хотира ҳамда маълумот сақлаш тўплагичлари нархи билан боғлиқ.

Унинг таъкидлашича, ўтган йили ҳам компания ушбу йўналишдаги қимматлашув ҳақида биринчи бўлиб очиқ огоҳлантиришлар берган эди.

Ҳозирги вақтда мазкур компонентлар нархининг ўсиши смартфонлар билан чекланиб қолмаяпти. Бу ҳолат планшетлар, ноутбуклар ва бошқа маиший электроника маҳсулотларининг ишлаб чиқариш харажатларига ҳам таъсир кўрсатмоқда.

Компания қўшимча харажатларни тўлиқ истеъмолчилар зиммасига юкламасликка ҳаракат қилаётганини билдирмоқда.

Янги нарх босқичи

Лей Сзюн таъминот занжирларини оптималлаштириш ва ички технологик ечимлар орқали харажатларни қисман қоплаш мумкинлигини айтди.

Бироқ компания вакиллари фикрича, хотира нархлари ҳозирги суръатларда ўсишда давом этса, қурилмаларни аввалги нархларда сақлаш тобора мураккаблашади.

«Xiaomi Group» президенти Лу Вейбин аввалроқ хотира маҳсулотлари қимматлашуви 2027 йил охиригача, эҳтимол 2028 йилгача давом этиши мумкинлигини билдирган эди.

Унинг баҳосига кўра, Хитойнинг айрим флагман смартфонлари нархи йил якунигача 10 минг юандан ошиб кетиши мумкин, бу тахминан 1470 долларни ташкил этади.

Бозорда бу таъсир аллақачон сезилмоқда, 2026-йил март ойидан бошлаб Хитойда кўплаб смартфон моделлари нархи 200−400 юанга — тахминан 29−59 долларга ошди.

Аввалроқ «Samsung» хотира чиплари танқислиги туфайли смартфон ва электроника нархлари ошишини маълум қилган эди.

«Counterpoint Research» таҳлилчиларига кўра, 2026 йил иккинчи чорагига келиб хотира модуллари нархи 50 фоизгача ошиши мумкин.

Айрим йирик компаниялар — «Dell», «Xiaomi» ва «Lenovo» — аллақачон захираларни кўпайтириш ёки мижозларни эҳтимолий қимматлашиш ҳақида огоҳлантиришга киришган.