So‘xda «Tul» chegara punkti yopildi

Farg‘ona viloyati bojxona boshqarmasi ma’lumotiga ko‘ra, «Tul» chegara nazorat-o‘tkazish punkti vaqtincha faoliyat ko‘rsatmaydi. Undan foydalanib kelgan fuqarolar va transport vositalari haydovchilari endilikda «Lenburg» chegara nazorat-o‘tkazish punktidan o‘tishi mumkin. Ma’lumotlarga ko‘ra, «Lenburg» punkti har kuni soat 06:00 dan 22:00 gacha ishlaydi. Ushbu punkt faqat O‘zbekiston va Qirg‘iziston fuqarolari hamda ikki mamlakat o‘rtasida harakatlanuvchi transport vositalari uchun mo‘ljallangan. Chegara punktining vaqtincha yopilishi sabablari haqida rasmiy ma’lumot berilmagan. Ammo mahalliy manbalar bu qaror texnik yoki tashkiliy ishlar bilan bog‘liq bo‘lishi mumkinligini aytishmoqda. O‘zbekiston va Qirg‘iziston o‘rtasidagi chegara punktlari mahalliy aholi va savdo yo‘nalishlari uchun muhim ahamiyatga ega. «Tul» punkti yopilishi ayrim yo‘lovchilar va tadbirkorlar harakatida vaqtinchalik noqulayliklar keltirishi kutilmoqda. Eslatib o‘tamiz, Farg‘ona viloyatidagi uchta muhim chegara bojxona posti — «Farg‘ona», «Oq qiya» va «Chashma» bojxona punktlari kunu-tun, ya’ni 24 soatlik ish rejimida faoliyat yuritadi.