«Starlink» рақиби энг йирик тижорий сунъий йўлдошни фазога чиқарди

Техасда жойлашган «AST SpaceMobile» компанияси ўзининг янги авлод тижорий сунъий йўлдоши — «BlueBird 6»ни муваффақиятли равишда Ер орбитасига чиқарди. Компания маълумотига кўра, ушбу аппарат ҳозирда дунёдаги энг катта тижорий сунъий йўлдош ҳисобланади.

«BlueBird 6» 23 декабрь куни Ҳиндистондаги Сатиш Дҳаван космик марказидан LVM3 ракета ёрдамида фазога учирилди. Янги сунъий йўлдош «AST SpaceMobile»нинг космос орқали мобил алоқа хизматини тўғридан тўғри смартфонларга етказиш концепциясида муҳим қадам сифатида баҳоланмоқда.

Компаниянинг мақсади — «SpaceX»га тегишли «Starlink» тармоғига рақобатчи бўлиш ва Ердаги қўшимча антенна ёки ускуналарсиз 5G алоқани таъминлашдир. «BlueBird 6» ушбу янги сунъий йўлдошлар гуруҳининг энг йирик ва илк намунаси ҳисобланади.

Бундан олдин компания 2022 йил сентябрида «BlueWalker 3» синов сунъий йўлдошини орбитага чиқарган ва 2023 йилда айнан шу аппарат орқали фазодан илк 5G қўнғироғини амалга оширган эди. Ҳозирга қадар жами олтита «BlueBird» туркумига мансуб сунъий йўлдош фазога чиқарилган.

«BlueBird 6»нинг қуёш панеллари очилганда умумий юзаси 223 квадрат метрга етади. Бу уни орбитага чиқарилган энг йирик тижорий сунъий йўлдошга айлантиради. Сунъий йўлдош 10 GHz диапазонни қўллаб-қувватлайди ва бир мобил қурилма учун сониясига 120 Mbps гача маълумот узатиш имкониятини беради.

Компания режаларига кўра, 2026 йил охиригача яна 45–60 та шундай сунъий йўлдош фазога чиқарилиши кўзда тутилган. Бу АҚШ ҳудуди ҳамда айрим бошқа минтақаларда тўлиқ 5G қамровини таъминлашга хизмат қилиши кутилмоқда.

Шу билан бирга, йирик ўлчамдаги сунъий йўлдошлар астрономлар ўртасида ташвиш уйғотмоқда. Мутахассислар бундай ёрқин объектлар осмон кузатувларига ва хавфли астероидларни аниқлаш жараёнларига салбий таъсир кўрсатиши мумкинлигини таъкидламоқда.