Тадбиркорлар учун янги солиқ имтиёзлари жорий этилади
Президентнинг тегишли қарори билан енгил саноат, пахта тайёрлаш ва тўқимачилик соҳаларида фаолият юритаётган тадбиркорлар учун қатор солиқ енгилликлари белгиланди.
Ўзбекистонда маҳаллий енгил саноат корхоналарини қўллаб-қувватлаш ва уларнинг ташқи бозорлардаги рақобатбардошлигини оширишга қаратилган янги солиқ имтиёзлари жорий этилади. Бу президентнинг ПФ–4-сонли фармонида назарда тутилган.
Ҳужжатга мувофиқ, 2026 йил 1 январдан бошлаб енгил саноат корхоналари қуввати 5 MW’гача бўлган қайта тикланувчи энергия манбалари қурилмаларидан фойдаланган ҳолда ишлаб чиқарилган электр энергиясининг корхона эҳтиёжидан ортиқча қисмини сотиш ҳуқуқига эга бўлади.
Шунингдек, пахта тайёрлаш пунктлари фаолиятининг мавсумийлиги инобатга олиниб, 2026 йил 1 январдан 2028 йил 1 январгача ушбу пунктларга мол-мулк ва ер солиқларини 50 фоизга камайтирилган ставкада тўлашга рухсат берилади.
2026 йил 1 январдан 2029 йил 1 январга қадар тижорат банклари балансидаги тўқимачилик ва тикув-трикотаж корхоналарининг мол-мулкларини инвесторларга реализация қилишда қўшилган қиймат солиғидан озод этиш белгиланди.
Бундан ташқари, ушбу корхоналарнинг мол-мулкларини харид қилган инвесторларга ишлаб чиқариш фаолиятини олти ой ичида тўлиқ тиклаш шарти билан бир йил муддатга мол-мулк солиғини 50 фоизга камайтирилган ставкада тўлаш имконияти берилади.
Фармон билан чарм-пойабзал, мўйначилик корхоналари ҳамда чорва молларини сўйиш ва терини қайта ишлаш билан шуғулланувчи ташкилотлар учун белгиланган фойда солиғи, мол-мулк солиғи, ер солиғи ва айланмадан олинадиган солиқлар бўйича имтиёзлар муддати ҳам узайтирилди.
Эслатиб ўтамиз, аввалроқ Ўзбекистонда 2026 йил 1 январдан ер солиғининг янги ставкалари кучга киргани ҳақида хабар бергандик.
