TAURUS raketalari masalasi Germaniyada hamon tabuligicha qolmoqda

Germaniyaning «Bild» gazetasi bosh muharriri o‘rinbosari Paul Ronshaymer 28 may kuni ijtimoiy tarmoqdagi sahifasida TAURUS raketa tizimlarini Ukrainaga yetkazib berish bo‘yicha hozircha hech qanday qaror qabul qilinmaganini ma’lum qildi. Unga ko‘ra, bu masala hozircha mamlakatda «taqiqlangan mavzu» sifatida qolmoqda. Ronshaymer Germaniya kansleri Fridrix Mersning yaqinda bildirgan bayonotini ham tanqid qilib, undagi «Ukraina buni hoziroq qila oladi», degan gap noto‘g‘ri tasavvur uyg‘otganini aytdi. Unga ko‘ra, Ukraina hozircha Germaniyadan olingan cheklangan masofali qurollardan foydalanmayapti va TAURUS raketalari umuman berilmagan. Jurnalistning ta’kidlashicha, Ukraina prezidenti Volodimir Zelenskiyning 28 may kuni Berlinga amalga oshirayotgan rasmiy tashrifi davomida ham ushbu raketa tizimlari masalasi muhokama qilinmasligi rejalashtirilgan. TAURUS — bu «havo–yer» turidagi, uzoq masofaga uchadigan, yuqori aniqlikka ega bo‘lgan raketa hisoblanadi. U juda past balandlikda (50 metr) uchish qobiliyatiga ega bo‘lib, dushman radiolokatorlaridan yashirinish uchun mo‘ljallangan. Raketa kuchli himoyalangan hududlarga zarba berish uchun ishlatiladi. Germaniyada ushbu raketalarni Ukrainaga berish masalasi ko‘p yillardan beri muhokamada bo‘lib kelmoqda. Avvalgi kansler Olaf Shols bu tashabbusni to‘xtatib kelgan bo‘lsa, hozirgi hukumat ham rasmiy qaror qabul qilmagan holda jiddiy qarama-qarshiliklarga duch kelmoqda.