Tojikiston elektrining 95 foizini GESlarda ishlab chiqaryapti
Tojikistonning yillik gidroenergetika salohiyati 527 milliard kilovatt-soatga baholanmoqda, ammo hozircha bu imkoniyatlarning faqat 4 foizi o‘zlashtirilgan.
© flickr.comTojikiston dunyoda «yashil» energiya ishlab chiqarish bo‘yicha yetakchi davlatlardan biri hisoblanadi, chunki mamlakatda ishlab chiqariladigan elektr energiyasining qariyb 95 foizi gidroelektrostansiyalar hissasiga to‘g‘ri keladi. Bu haqda Tojikiston energetika va suv resurslari vazirligi Boku energetika forumi yakunlari bo‘yicha ma’lum qildi.
1-iyun kuni Bokuda Tojikiston energetika va suv resurslari vaziri o‘rinbosari Sharif Mahmadzoda «Barqaror va diversifikatsiya qilingan energetik kelajak uchun xalqaro hamkorlik» mavzusidagi vazirlar yalpi sessiyasida nutq so‘zladi. Shuningdek, u Markaziy Osiyoda qayta tiklanuvchi energiya manbalari asosida energetik transformatsiyani ilgari surishga bag‘ishlangan vazirlar muloqotida ishtirok etdi.
Gidroelektrostansiyalar
«Tojikiston uchun energetik transformatsiya nafaqat global iqlim kun tartibining bir qismi, balki milliy taraqqiyot, energetik xavfsizlik, sanoat o‘sishi va aholi turmush sifatini yaxshilashning strategik shartidir», – dedi Sharif Mahmadzoda.
Uning ta’kidlashicha, mamlakat elektr energetikasi tizimining asosini qayta tiklanuvchi gidroenergetika tashkil etadi.
Shu bilan birga, Tojikistonning gidroenergetika salohiyati yiliga taxminan 527 milliard kilovatt-soatga baholanmoqda. Biroq bu imkoniyatlarning hozircha atigi 4 foizi o‘zlashtirilgan.
Markaziy Osiyoning yagona energetika tizimi va CASA-1000 loyihasi
Vazir o‘rinbosari iqlim o‘zgarishi, muzliklarning erishi, daryolar oqimining mavsumiy o‘zgarishi hamda elektr energiyasiga talabning o‘sishi energetika tarmog‘ini diversifikatsiya qilish, infratuzilmani modernizatsiya qilish va quyosh, shamol hamda boshqa qayta tiklanuvchi energiya texnologiyalarini keng joriy etishni talab qilayotganini qayd etdi.
Forumda energetika sohasidagi mintaqaviy hamkorlikning ahamiyatiga ham alohida e’tibor qaratildi. Vazirlik ma’lumotiga ko‘ra, Tojikistonning Markaziy Osiyoning yagona energetika tizimiga qayta ulanishi va CASA-1000 loyihasining amalga oshirilishi toza energiya mintaqaviy bozorini rivojlantirish hamda Markaziy va Janubiy Osiyo o‘rtasidagi energetik o‘zaro bog‘liqlikni mustahkamlashning muhim omillari sifatida baholanmoqda.
