«Toshkent City»da quriladigan $25 mlrdlik moliya markazi, internetsiz mobil tariflar va to‘lovga qobiliyatsiz korxonalarni «tiriltirish» agentligi — 3-aprel dayjesti

Mobil operatorlarga internetsiz tarif taklif qilish majburiy bo‘lishi mumkin

O‘zbekistonda mobil operatorlarga internetsiz tariflarni joriy etish majburiy bo‘lishi mumkin. Adliya vazirligi taklif qilgan qaror loyihasiga ko‘ra, operatorlar qo‘ng‘iroq va SMSdan iborat alohida tariflarni ham taqdim etishi kerak bo‘ladi. Shuningdek, tariflarni nomlashda abonent to‘lovi yoki xizmat hajmiga bog‘lash taqiqlanishi taklif etilgan. Loyiha 2026 yil 31-martdan jamoatchilik muhokamasiga qo‘yilgan.

Mutaxassislar ta’kidlashicha, bu tashabbus internetdan foydalanmaydigan fuqarolar uchun arzon variantlar yaratishga qaratilgan. Iqtisodchi Otabek Bakirov esa operatorlar internet trafikni sun’iy oshirish orqali tariflarni qimmatlashtirayotganini tanqid qildi. Uning fikricha, ushbu amaliyot bozorda odatiy holga aylangan va iste’molchilar manfaatlari yetarlicha himoya qilinmayapti, shuning uchun jamoatchilik ushbu loyihani qo‘llab-quvvatlashi muhim.

Ko‘p qavatli uylar yashil hududini betonlashtirganlar jarimaga tortiladi

O‘zbekistonda ko‘p kvartirali uylar atrofidagi yashil va tuproqli hududlarni noqonuniy betonlashtirganlik uchun ma’muriy javobgarlik kuchaytirildi. Prezident tomonidan imzolangan qonunga muvofiq, bunday harakatlar huquqbuzarlik sifatida baholanadi va atrof-muhitni muhofaza qilishga qaratilgan choralar kuchaytirildi.

Yangi tartibga ko‘ra, fuqarolarga BHMning 50 baravarigacha (20,6 mln so‘m), mansabdor shaxslarga esa 100 baravarigacha (41,2 mln so‘m) jarima qo‘llanadi. Shu bilan birga, qoidabuzar o‘zboshimchalik bilan qurilgan obyektlarni ixtiyoriy ravishda bartaraf etsa, ma’muriy javobgarlikdan ozod qilinishi mumkin.

Toshkent xalqaro moliya markazi «Toshkent City» hududida joylashadi

O‘zbekistonda Toshkent xalqaro moliya markazi «Toshkent City» hududida joylashtirilishi rejalashtirilmoqda. Prezident farmoniga ko‘ra, markaz «Aloqabank», «Asakabank», «SQB» va «Bomi Finance Center» binolari negizida tashkil etilib, yangi binolar qurish o‘rniga mavjud infratuzilmadan foydalanish ko‘zda tutilgan. Hisob-kitoblarga ko‘ra, 2030-yilgacha ushbu markaz orqali iqtisodiyotga 20–25 mlrd dollar investitsiya jalb qilinishi mumkin.

Markaz faoliyati investitsiyalarni jalb qilish, kapital bozorini rivojlantirish, moliyaviy xizmatlarni kengaytirish va innovatsion ekotizimni shakllantirishga qaratilgan. Shuningdek, ishtirokchilar uchun keng imtiyozlar joriy etilib, xorijiy mutaxassislar uchun yengil shartlar, valuta va kriptoaktivlarda hisob-kitob qilish imkoniyati hamda 2076-yilgacha bir qator soliq imtiyozlari taqdim etilishi belgilangan.

To‘lovga qobiliyatsizlik ishlari bo‘yicha agentlik tashkil etiladi

O‘zbekistonda to‘lovga qobiliyatsizlik tizimini takomillashtirish doirasida maxsus agentlik tashkil etish rejalashtirilmoqda. Loyihaga ko‘ra, Adliya vazirligi huzurida yangi agentlik tuzilib, u sohada yagona davlat siyosatini yuritish, davlat organlari faoliyatini muvofiqlashtirish va korxonalarni moliyaviy sog‘lomlashtirish bilan shug‘ullanadi. Shuningdek, Sud boshqaruvchilari palatasini tashkil etish, mutaxassislar malakasini oshirish va kasbiy standartlarni joriy qilish ham ko‘zda tutilgan.

Tahlillarga ko‘ra, amaldagi tizim korxonalarni saqlab qolishdan ko‘ra tugatishga ko‘proq yo‘naltirilgan: 93 ming muammoli tadbirkordan faqat 10 mingtasi bo‘yicha ish qo‘zg‘atilgan, so‘nggi besh yilda esa 68 ta korxonada sanatsiya o‘tkazilib, atigi 7 tasi tiklangan. Yangi mexanizmlar doirasida kreditlarni kechiktirish, qarzlarni restrukturizatsiya qilish, soliq imtiyozlari berish va raqamli platforma orqali jarayonlarni onlayn boshqarish rejalashtirilmoqda.

O‘zbekistonda narxlarni sun’iy oshirgan dorixonalar litsenziyadan mahrum etildi

O‘zbekistonda dori vositalari narxini asossiz oshirgan dorixonalarga nisbatan choralar kuchaytirilib, bir qator kompaniyalar litsenziyadan mahrum etildi.

Raqobat qo‘mitasi ma’lumotiga ko‘ra, 2025 yil boshidan «Fair Tech» tizimi orqali 414 mingdan ortiq holatda narx oshirish aniqlangan, joriy yil yanvar–mart oylarida esa 146 mingdan ziyod murojaat kelib tushgan. Qoidabuzarliklar 991 ta dorixonada qayd etilgan.

Tekshiruvlar natijasida iste’molchilar foydasiga 8,5 mlrd so‘m qayta hisob-kitob qilindi. Shuningdek, litsenziya talablari buzilgani uchun so‘nggi 15 oyda 6 ta kompaniya dorixona faoliyati uchun berilgan litsenziyasidan mahrum etildi va tegishli materiallar vakolatli organlarga yuborildi.