«Toshshahartrans»ning 7,5 yilga qamalgan sobiq rahbari yarim yilda ozod etildi
28.07.2025 | 11:3035793
Juda ko‘p miqdorda talon-torojlik va boshqa og‘ir jinoyatlarda ayblangan Anvar Jo‘rayev 7,5 yilga qamalgan edi. Biroq sud 2025 yil iyun oyida uning jazosini yengillatib, ozodlikka chiqarishga qaror qildi.
«Toshshahartransxizmat» aksiyadorlik jamiyatining sobiq rahbari Anvar Jo‘rayev 2024 yil fevral oyida hibsga olingan va joriy yil boshida sud tomonidan 7,5 yilga ozodlikdan mahrum etilgandi. Uning ustidan juda ko‘p miqdorda o‘zlashtirish, soliqdan bo‘yin tovlash, mansab vakolatini suiiste’mol qilish, soxtakorlik va jinoiy daromadlarni legallashtirish kabi 7 ta modda bo‘yicha ayblovlar qo‘yilgandi.
Biroq, 2025 yil 5 iyun kuni Toshkent shahar sudining jinoyat ishlari bo‘yicha apellyatsiya instansiyasi sudlov hay’ati uning jazosini yengillatish haqida qaror qabul qildi. Yangi qarorga muvofiq, Jo‘rayevga 4,5 yillik ozodlikni cheklash jazosi tayinlandi. Shu bilan birga, u kelasi 3 yil mobaynida «Toshshahartransxizmat» tizimida moddiy javobgarlik va rahbarlik vazifalarida faoliyat yuritishi taqiqlandi.
Bu qaror, jinoyat ishining qayta ko‘rib chiqilishi va ehtimoliy yengillashtiruvchi holatlar tufayli qabul qilingan bo‘lishi mumkin. Ammo sud qarorida bu haqda aniq ma’lumotlar berilmagan.
Sud tomonidan jazoni yengillashtirish holati jamoatchilikda turli fikrlarga sabab bo‘lmoqda. Sababi, dastlab unga nisbatan juda og‘ir ayblovlar qo‘yilgan va u ko‘p muddatga ozodlikdan mahrum etilgandi. Hozirda Jo‘rayev ozodlikda, ammo belgilangan cheklovlar va jazo shartlari bo‘yicha nazorat ostida qoladi.
