Трамп Будепешт саммитини бекор қилгач, Россия қимматли қоғозлар бозори энг катта қулашни бошдан кечирди
Москва биржасида акциялар 4,1 фоизга қулади. Россия бозори 256 млрд рубл капитализация йўқотди, бу 2022 йилдан буён кузатилган энг катта қулаш ҳисобланади.
Доналд Трампнинг Владимир Путин билан Украинадаги урушни муҳокама қилиш учун режалаштирилган учрашувни бекор қилиш қарори Россия фонд бозорида кучли сейсмик таъсир кўрсатди. Сешанба куни кечки савдоларда Москва биржаси индекси 4,1 фоизга пасайиб, сўнгги уч йилдаги энг катта қулашни қайд этди.
Таркибига Россиянинг энг йирик компаниялари акциялари кирувчи кўрсаткич — Мосбиржа индекси 256 млрд рублга қиймат йўқотиб, 2632,4 пунктгача тушди. Тунда «Газпром» акциялари 5 фоизга, «Сбербанк» — 3,5 фоизга, «ВТБ» — 3,8 фоизга, «Роснефт» — 3 фоизга арзонлади. «Аэрофлот» 5,4 фоиз, «Полюс» эса 6,1 фоиз қиймат йўқотди.
«Финам» компанияси таҳлилчиси Максим Абрамовнинг таъкидлашича, бозордаги таназзулга асосий сабаб — ташқи сиёсий хавф ва санкцияларнинг кучайиши бўлди. Оқ уй расмий вакили саммитнинг яқин орада ўтказилмаслигини маълум қилгач, инвесторлар ишончи янада пасайган.
Будапештдаги саммит тайёргарлиги Трампнинг Путиндан радикал талаблардан чекинишни кутганига қарамай, Россиянинг ўз позициясидан воз кечмагани сабабли тўхтатилган. Путин Киевдан Донецк областидаги қўшинларни олиб чиқишни талаб қилган, бу эса Трампнинг «фронт чизиғини музлатиш» таклифига зид эди.
Россия ташқи ишлар вазири Сергей Лавров Россия ҳеч қандай оташкесимга рози эмаслигини маълум қилди. Унинг сўзларига кўра, бу «Украинани яна қурол билан таъминлаш ва Россияга қарши террорчилик ҳаракатларини рағбатлантириш»га олиб келади.
Бозорга қўшимча босим Словакиянинг ЕИ санкцияларининг 19-пакетини қўллаб-қувватлаши, Полша томонидан Путин самолётини мажбурий қўндириш таҳдиди ва Россия Марказий банкининг асосий ставка бўйича йиғилишига оид кутилмалар билан боғлиқ бўлди.
