Tramp G‘azoda yaqin haftada o‘t ochish to‘xtashini aytdi

27 iyun kuni AQSH prezidenti Donald Tramp Isroil va HAMAS o‘rtasida yaqin hafta ichida G‘azoda o‘t ochish to‘xtatilishi mumkinligini ma’lum qildi. Tramp jurnalistlar bilan suhbatda muzokaralarga aloqador ayrim shaxslar bilan gaplashganini aytdi, biroq aniq kim bilan muloqot qilganini ochiqlamadi. Al Jazira telekanali tahlilchisi ta’kidlashicha, bu bayonot G‘azo aholisi uchun umidli yangilik bo‘lishi mumkin, ammo hozir mintaqada hech qanday rasmiy muzokara olib borilayotgani kuzatilmayapti. Isroil urushni to‘xtatishni muhokama qilishdan hozircha bosh tortmoqda va Isroil bosh vaziri Binyamin Netanyahu bu yo‘lda siyosiy xavfga duch kelishi mumkin. HAMAS esa o‘t ochishni to‘xtatish uchun Isroilning G‘azodan chiqishini va AQSH tomonidan kafolat berilgan, barqaror muzokaralar bo‘lishiga ishonch talab qilmoqda. Trampning bayonoti G‘azoda qon to‘kilishlar avjiga chiqqan, Isroil armiyasi gumanitar yordam izlayotgan fuqarolarni o‘qqa tutayotgani haqidagi ayblovlar tobora ko‘paygan bir paytga to‘g‘ri keldi. G‘azo sog‘liqni saqlash vazirligi ma’lumotlariga ko‘ra, may oyidan buyon AQSH va Isroil qo‘llab-quvvatlayotgan yordam tarqatish nuqtalari yaqinida 550 nafar falastinlik halok bo‘lgan. BMT Bosh kotibi Antoniu Guterrish «odamlar faqat oilasini boqish uchun halok bo‘lyapti, oziq-ovqat izlash hech qachon o‘limga olib kelmasligi kerak», deb bayonot berdi. Cheklarsiz Tibbiyot (MSF) tashkiloti esa vaziyatni «insonparvarlik yordami niqobida qirg‘in» deb atadi. Ayni paytda Tramp ma’muriyatida G‘azo bo‘yicha maxsus vakil Stiv Uitkoffning ofisi G‘azoda o‘t ochish to‘xtashi bo‘yicha aniq ma’lumot mavjud emasligini ma’lum qildi. Isroil rasmiylari esa faqat harbiy harakatlar orqali G‘azoda saqlanayotgan asirlarni qaytarish mumkinligini ta’kidlamoqda. Isroilning Strategik ishlar vaziri Ron Dermer kelasi hafta Vashingtonda Tramp ma’muriyati bilan G‘azo, Eron va Netanyahuning ehtimoliy safari yuzasidan muzokaralar o‘tkazishi kutilmoqda.