Tramp Rossiya va Ukraina kelishuvga erishganini e’lon qildi

AQSH prezidenti Ukrainaning Rossiya energetika obyektlariga zarba bermaslikka rozi bo‘lganini ma’lum qildi. Rossiya ham Ukrainaga nisbatan xuddi shunday yo‘l tutishi kelishib olingan. Donald Tramp bu haqda o‘zining «Truth Social» ijtimoiy tarmog‘ida yozdi.

Amerika prezidentining bayonoti hozircha Moskva va Kiyev tomonidan rasman tasdiqlanmadi. Shu sababli kelishuvning qachon kuchga kirishi, qancha muddat amal qilishi va qaysi obyektlarga tatbiq etilishi noma’lum.

Tramp dunyoda dizel yoqilg‘isi narxining o‘sishida asosiy omil Rossiya–Ukraina urushi ekanini ta’kidladi. U bu o‘sishni Eron atrofidagi vaziyat bilan bog‘lash to‘g‘ri emasligini bildirdi.

Dizel muammosi

Trampning bu pozitsiyasi 13-sentabrdagi bayonotlaridan keyin yangradi. Unda u Ukraina prezidenti Volodimir Zelenskiyni Rossiyadagi dizel yoqilg‘isi zaxiralari va ishlab chiqarish obyektlariga zarba berishni to‘xtatishga chaqirdi.

«Janob Volodimir Zelenskiy faqat bir ishni qilishi kerak. U Rossiyadagi dizel yoqilg‘isi zaxiralarini yo‘q qilishni bas qilishi lozim. U dizel tanqisligini keltirib chiqarmoqda», — dedi Tramp.

So‘nggi oylarda Ukraina Rossiyaning neftni qayta ishlash zavodlari va boshqa energetika obyektlariga uzoq masofali dronlar orqali zarbalar berib kelmoqda. Kiyev bunday obyektlarni Rossiya harbiy mashinasini moliyalashtiruvchi muhim infratuzilma sifatida ko‘radi.

Muzokaralar fonida

8-sentabr kuni Tramp Rossiya Federatsiyasi prezidenti Vladimir Putin bilan suhbatlashdi

9-sentabr kuni Tramp Putin tinchlik kelishuviga tayyor ekanini aytdi va Zelenskiy ham bunday kelishuvga rozi bo‘lishidan umid bildirdi.

Biroq hozircha energetika obyektlariga zarba berishni to‘xtatish bo‘yicha aytilgan kelishuvning aniq shartlari va amal qilish mexanizmi ma’lum emas.