Tramp tahdidi va unga bozorning reaksiyasi

Erondagi urush bilan bog‘liq xavotirlar kuchaygani sabab fond va xomashyo bozorlarida keskin pasayish yuz berdi: aksiyalar, oltin va bitkoin quladi, neft esa ikki kunlik pasayishdan so‘ng qimmatladi, deb xabar beradi «Reuters».

Tramp yana neftni ko‘tardi

«Bugun kechqurun men ayta olamanki, biz yaqin vaqt ichida, juda tez orada, Amerikaning barcha harbiy vazifalarini bajarish yo‘lidamiz. Keyingi ikki-uch hafta davomida ularga juda qattiq zarba beramiz. Biz ularni yana tosh davriga qaytarib yuboramiz, ularga o‘sha joy munosib», – dedi Tramp, shu bilan urush yana bir necha hafta davom etishini anglatib.

Trampning nutqidan so‘ng investorlar deyarli barcha aktivlarni sotishga qaytdi (AQSH dollaridan tashqari) va neft narxlarini yuqoriga haydadi. «Brent» markali neft bo‘yicha iyun fyucherslari (yaqin oy yetkazib berish) savdolar davomida maksimumda deyarli 7 foizga oshib, bir barrel uchun 108,15 dollarga yetdi, nashr vaqtida esa 107 dollar atrofida savdo qilinmoqda. AQSH aksiyalari bo‘yicha fyucherslar 1 foizga, Yevropa aksiyalari esa 1,5 foizdan ko‘proqqa tushdi.

Aksiyalar tushishi

Osiyo aksiyalari kuchli bosim ostida qoldi: Yaponiyaning «Nikkei» 225 indeksi 2,3 foizga tushdi, Janubiy Koreyaning «Kospi» indeksi esa 4,2 foizga quladi. «MSCI» tomonidan Yaponiyani hisobga olmagan Osiyo-Tinch okeani mintaqasining keng aksiya indeksi 2 foizdan ko‘proqqa pasaydi, deyarli barcha Osiyo fond birjalari «qizil zona»ga o‘tdi.

Oltin qanday javob berdi?

Oltin narxlari bugun, 2-aprel kuni Osiyo savdolarida pasaydi va to‘rt sessiyalik o‘sishni to‘xtatdi. Spot oltin narxi oxirgi marta 1,4 foizga tushib, unsiyasi 4 693,12 dollar bo‘ldi, avval esa sessiya davomida 4 800,58 dollargacha ko‘tarilgan edi.

AQSHdagi oltin fyucherslari deyarli 2 foizga tushib, unsiyasi 4 721,80 dollarga yetdi. Boshqa qimmatbaho metallar orasida kumush narxi 3,2 foizga tushib 72,77 dollar/unsiya bo‘ldi, platina esa 1,7 foizga pasayib 1 934,60 dollar/unsiyaga yetdi.

Bitkoin

«Bitcoin» bugun, 2-aprel kuni tushdi va kriptovalyutalar hamda riskli aktivlarning umumiy pasayishiga ergashdi. Dunyodagi eng yirik kriptovalyuta aprel boshidagi nisbatan ijobiy boshlanishdan so‘ng pozitsiyalarini yo‘qotdi, ammo yil davomida kuzatilgan savdo diapazonida qoldi.

Bitkoin 2,9 foizga tushib, soat 09:00 holatiga ko‘ra 66 465,7 dollarga yetdi.